ഈ ബൈബിളിന്റെ തന്നെ ആമുഖം എന്ന ഭാഗം ആറാം ഖണ്ഡികയിൽ നമ്മൾ ഇപ്രകാരമാണ് വായിക്കുന്നത്: ദൈവത്തേയും മനുഷ്യനേയും സംബന്ധിച്ച കാര്യങ്ങളിൾ ബൈബിൾ പ്രമാദ രഹിതമാണ് അഥവാ അബദ്ധരഹിതമാണ്. അതിന്റെ അർത്ഥം ബൈബിളിൽ പറഞ്ഞിരിക്കുന്ന കാര്യങ്ങൾ തെറ്റില്ലാത്തതും തെറ്റു വരാൻ പാടില്ലാത്തതുമാണ് എന്നാണ്.

വീണ്ടും പത്രോസിന്റെ രണ്ടാം ലേഖനം ഒന്നാം അധ്യായം 20 മുതൽ വാക്യങ്ങളിൽ നാം ഇപ്രകാരം കാണുന്നു. ആദ്യം നിങ്ങൾ ഇതു മനസ്സിലാക്കുവിൻ: “വിശുദ്ധ ലിഖിതത്തിൽ പ്രവചനങ്ങൾ ഒന്നുംതന്നെ ആരുടേയും സ്വന്തമായ വ്യാഖ്യാനത്തിന് ഉള്ളതല്ല. എന്തുകൊണ്ടെന്നാൽ പ്രവചനങ്ങൾ ഒരിക്കലും മാനുഷിക ചോദനയാൽ രൂപം കൊണ്ടതല്ല; പരിശുദ്ധാത്മാവിനാൽ പ്രചോദിതരായി, ദൈവത്തിന്റെ മനുഷ്യർ സംസാരിച്ചതാണ്.”

യേശുക്രിസ്തുവിന്റെ മറുരുപമലയിലെ രൂപാന്തരം ദർശിച്ച പത്രോസ് ആ അനുഭവവും മനസ്സിൽ വെച്ചുകൊണ്ടാണ് എഴുതപ്പെട്ട വചനവും ദൈവത്തിന്റെ വചനം തന്നെയാണ് എന്ന് പറയുന്നത്. അതിനു നാം വളരെ ശ്രദ്ധ നൽകേണ്ട ഒന്നാണ്. അതിനു ദൈവത്തിന്റേതായ അധികാരവും നിയമസാധുതയും ഉണ്ട്. അനുഭവത്തിൽ അധിഷ്ഠിതമായ ഇന്നത്തെ കാലഘട്ടത്തിൽ ചില ക്രിസ്ത്യാനികൾ ഉൾപ്പടെ അനേകം ആളുകൾ സത്യത്തെ തീരുമാനിക്കുന്നത് തങ്ങളുടെ ജിവിതത്തിൽ ദൈവം ചില പ്രത്യേക നിലയിൽ ഇടപട്ടതിന്റെ അടിസ്ഥാനത്തിൽ ആണ്. എന്നാൽ പത്രോസിന്റെ ജീവിതത്തിലെ ആ വലിയ മറുരൂപ-അനുഭവം മങ്ങിപ്പോയതുപോലെയാണ് എഴുതപ്പെട്ട പ്രവാചകവചനങ്ങളുടെ പ്രാധാന്യത്തെ താൻ എടുത്തു പറയുന്നത്.

അപ്പൊസ്തലൻ “വിശുദ്ധ ലിഖിതങ്ങൾ ഒന്നും തന്നെ ആരുടേയും സ്വന്തമായ വ്യഖ്യാനത്തിനുള്ളതല്ല” എന്നു പറയുമ്പോൾ താൻ അർത്ഥമാക്കുന്നത് പ്രവചനങ്ങൾ ഉത്ഭവിച്ചത് പ്രവാചകന്മാരിൽ നിന്നല്ല, മറിച്ച് ദൈവത്തിൽ നിന്നാണ് അവ ഉത്ഭവിച്ചത് എന്നാണ്. അല്ലാതെ അത് പുരോഹിതന്മാരല്ലാത്തവർ വായിക്കുകയൊ വ്യാഖ്യാനിക്കുകയൊ ചെയ്യരുത് എന്നല്ല. അവ ദൈവത്തിൽ നിന്നുള്ള വെളിപ്പാടുകളാണ്. ദൈവത്തിന്റെ പരിശുദ്ധാത്മാവിനാൽ നിശ്വസിക്കപ്പെട്ട് എഴുതപ്പെട്ടവയാണ് എന്നാണ്. അവ എല്ലാവരും വായിക്കുകയും മനസ്സിലാക്കുകയും അനുസരിക്കുകയും വേണം .

അനുഭവങ്ങളെ കുറിച്ചു പറയുമ്പോൾ അതെല്ലാം ദൈവത്തിൽ നിന്നും വന്ന അനുഭവങ്ങളാണ് എന്ന് ആർക്കാണ് പറയുവാൻ കഴിയുക. സാത്താനും പല അനുഭവങ്ങളും മനുഷ്യനു നൽകുവാൻ കഴിയും. അവ ദൈവത്തിൽ നിന്നാണോ അതൊ പിശാചിൽ നിന്നാണോ എന്ന് അറിവാൻ ദൈവത്തിന്റെ വചനമായ ബൈബിൾ പരിശോധിക്കുകയാണ് വേണ്ടത്. ദൈവത്തിന്റെ വചനത്തിൻ പ്രകാരമല്ലാത്ത അനുഭവങ്ങൾ വ്യാജമാണ്. അവ മനുഷ്യനെ വഴിതെറ്റിക്കാൻ വേണ്ടി പിശാച് ഒരുക്കുന്ന കെണികളാണ് എന്ന് നാം ഓർക്കണം.

ഇനിയും വെളിപ്പാട് 22:18-19 വാക്യങ്ങളിൽ നമ്മൾ ഇപ്രകാരം വായിക്കുന്നു: ആരെങ്കിലും ഈ “വചനങ്ങളോട്” എന്തെങ്കിലും കൂട്ടിച്ചേർത്താൽ ഈ പുസ്തകത്തിൽ വിവരിക്കപ്പെട്ടിരിക്കുന്ന മഹാമാരികൾ ദൈവം അവന്റെ മേൽ അയക്കും. ഈ പുസ്തകത്തിലെ പ്രവചനങ്ങളിൽ നിന്ന് ആരെങ്കിലും എന്തെങ്കിലും എടുത്തു കളഞ്ഞാൽ ഈ പുസ്തകത്തിൽ വിവരിക്കപ്പെട്ടിരിക്കുന്ന വിശുദ്ധ നഗരത്തിലും ജീവവൃക്ഷം ഉള്ള അവരുടെ പങ്ക് ദൈവം എടുത്തുകളയും.”
നിയമാവർത്തനം 4:2 വാക്യങ്ങളിൽ നമ്മൾ ഇപ്രകാരം വായിക്കുന്നു: “ഞാൻ നൽകുന്ന കല്പനകളോടു യാതൊന്നും കൂട്ടിച്ചേർക്കുകയോ അതിൽ നിന്ന് എന്തെങ്കിലും എടുത്തുകളയുകയൊ അരുത്. ഞാൻ നിങ്ങളെ അറിയിക്കുന്ന നിങ്ങളുടെ ദൈവമായ കർത്താവിന്റെ കൽപ്പനകൾ അനുസരിക്കുവിൻ.”

മേൽവിവരിച്ച മൂന്നു സുവിശേഷ ഭാഗങ്ങളിൽനിന്നും ബൈബിൾ ഭാഗങ്ങൾ ആരുടേയും സ്വന്തമായ വ്യാഖ്യാനത്താൽ ഉളവായതല്ലെന്നും, എന്തെങ്കിലും അതിനോട് കൂട്ടിച്ചേർക്കാനോ, അതിൽ നിന്നും എടുത്തു കളയാനോ ആർക്കും അധികാരമില്ലെന്നും, അപ്രകാരം ചെയ്യുന്ന പക്ഷം ആയതിനുള്ള ശിക്ഷ ദൈവം തന്നെ അവന്റെ മേൽ അയക്കുമെന്നും വ്യക്തമാണല്ലോ.

ഈ സുവിശേഷ വാക്യങ്ങളുടെ വെളിച്ചത്തിൽ ദൈവം നമുക്ക് നൽകിയ പത്ത് കല്പനകളും വേദോപദേശ പുസ്തകങ്ങൾ വഴി കത്തോലിക്കാസഭ ഇന്ന് പഠിപ്പിച്ചുകൊണ്ടിരിക്കുന്ന പത്തു കല്പനകളും നമുക്ക് താരതമ്യം ചെയ്ത് പരിശോധിക്കാം.