ഒരു വ്യക്തി രക്ഷിക്കപ്പെടുന്നതിനു മുന്നമെ പല പാപത്തിലും ജീവിച്ചിരുന്ന വ്യക്തിയായിരുന്നു എന്നു കാണുവാൻ കഴിയും. മറ്റെങ്ങും നോക്കേണ്ട ആവശ്യമില്ല, നമ്മിലേക്കു തന്നെ നോക്കിയാൽ അതു സത്യമാണ് എന്ന് ബോദ്ധ്യപ്പെടും. അങ്ങനെയുള്ള പാപങ്ങളിൽ ഒന്നാണ് മോഷണം എന്നത്. ഒരു പക്ഷേ, മറ്റുള്ളവരുടെ ഭവനങ്ങളിൽ അതിക്രമിച്ചു കയറി മോഷണം ചെയ്തില്ലെങ്കിൽ കൂടി അത്യാവശ്യം നാം ജോലി ചെയ്യുന്ന സ്ഥാപനങ്ങളിൽ നിന്നുമൊക്കെ ചില സാധനങ്ങൾ കൊണ്ടു പോരുക അതല്ലെങ്കിൽ അന്യരുടെ വസ്തുക്കളിൽ നിന്നും തേങ്ങയൊ മാങ്ങയൊ അങ്ങനെ എന്തെങ്കിലും എടുത്താൽ അതൊരു പാപമെയല്ല എന്ന് ചിന്തിച്ചിരുന്നവരാണ് നാം. എന്നാൽ ഒരു ദൈവപൈതലായശേഷം ഈ വക പാപങ്ങൾ നമ്മുടെ ജീവിതത്തിലുണ്ടാകാൻ പാടില്ല. മാത്രവുമല്ല അവനിൽ വളരെ ഉന്നതമായ ഒരു നിലവാരമാണ് ദൈവം പ്രതീക്ഷിക്കുന്നത്.

ഇവിടെ ഒരു താഴ്ന്ന നിലവാരത്തിൽ നിന്ന്, അതായത്, ഒരു കള്ളന്റെ നിലവാരത്തിൽ നിന്ന്, വളരെ ഉയർന്ന നിലവാരത്തിലേക്ക് ഒരു വിശ്വാസി ഉയരുന്നു എന്നു കാണുവാൻ കഴിയും.
ആദ്യമായി, പണമുണ്ടാക്കാനുള്ള ചില രീതികളെ കുറിച്ച് നമുക്കു ചിന്തിക്കാം.

ഒന്നാമതായി, നിങ്ങൾക്കുണ്ടാകേണ്ടതിനു മോഷ്ടിക്കാം.

രണ്ടാമതായി, നിങ്ങൾക്കുണ്ടാകേണ്ടതിനു ജോലി ചെയ്യാം.

മൂന്നാമതായി, മറ്റുള്ളവർക്കു കൊടുക്കുവാൻ വേണ്ടി അദ്ധ്വാനിക്കാം, ജോലി ചെയ്യാം.

ഒന്നാമത്തേത്, അതായത്, മോഷ്ടിക്കുന്നത്, നമുക്കറിയാം നിയമവിരുദ്ധമായതാണ് എന്ന്. രണ്ടാമത്തേത്, ജോലി ചെയ്ത് പണമുണ്ടാക്കുക, അത്, നിയമവിധേയമായ കാര്യമാണ്.

ആദ്യത്തെ രണ്ടു രീതികളും നിങ്ങളുടെ ആഗ്രഹങ്ങളെയും മോഹങ്ങളെയും തൃപ്തിപ്പെടുത്താനുള്ള പ്രചോദനത്തിൽ നിന്നുളവാകാം. അത്യാഗ്രഹത്താൽ നിങ്ങൾ മോഷ്ടിക്കുന്നു. അതുപോലെ, മോഹത്തെ തൃപ്തിപ്പെടുത്താൻ വേണ്ടി ജോലി ചെയ്യുന്നു. ഒന്നാമത്തേത്, നിയമവിരുദ്ധവും രണ്ടാമത്തേത് നിയമവിധേയവും. എന്നാൽ അത് നമ്മുടെ ആഗ്രഹങ്ങളേയും മോഹങ്ങളേയും തൃപ്തിപ്പെടുത്താൻ വേണ്ടിയാണെങ്കിൽ രണ്ടും പാപകരമാണ്. കാരണം അതിന്റെ ലക്ഷ്യം നമ്മുടെ മോഹത്തെ തൃപ്തിപ്പെടുത്തുക എന്നതാണ്. ന്യായപ്രമാണത്തിലെ 10-ാമത്തെ കൽപ്പന “മോഹിക്കരുത്” എന്നുള്ളതാണ്. അതുകൊണ്ട് മോഹത്തെ തൃപ്തിപ്പെടുത്താനുള്ള ഏതു ശ്രമവും പാപകരമാണ്.

ആകയാൽ, പൗലോസ് അത്രയും പറഞ്ഞ് അവിടെ അവസാനിപ്പിക്കുന്നില്ല. പൗലോസ് വളരെ ശേഷ്ഠമായ നിലവാരത്തിലേക്ക് കടക്കുന്നു. നമുക്ക് സമ്പാദിക്കാൻ വേണ്ടി ജോലി ചെയ്യാം. അതു പൊതുവെയുള്ള രീതിയാണ്. നിങ്ങൾ സമ്പാദിച്ചാൽ അത് നിങ്ങളുടെതായിരിക്കും. എന്നാൽ അത് ഒരു ക്രിസ്തീയ ആദർശമല്ല. ഈ വേദഭാഗം നൽകുന്ന സമൂലമായ മാറ്റമെന്നത്, നാം അദ്ധ്വാനിക്കുന്നതും ജോലി ചെയ്യുന്നതും മറ്റുള്ളവരുടെ ആവശ്യങ്ങൾ നിവർത്തിക്കണം എന്ന കാഴ്ചപ്പാടോടെയാകണം എന്നുള്ളതാണ്. നിങ്ങൾക്കുണ്ടാകേണ്ടതിനായി ജീവിക്കാം, അതു നിയമവിധേയമൊ നിയമവിരുദ്ധമൊ ആകാം. എന്നാൽ നിങ്ങൾക്ക് കൊടുക്കാൻ വേണ്ടി അദ്ധ്വാനിച്ചുകൊണ്ട് ഒരു ക്രിസ്ത്യാനിയാകാം എന്നാണ് പൗലോസ് പറഞ്ഞുവരുന്നത്. ഇത് എത്ര അതിശയകരമായ പഠിപ്പിക്കൽ ആണ് എന്നു നോക്കുക. ഈയൊരു കാര്യം നിങ്ങൾക്കു മനസ്സിലായാൽ അതിനു നിങ്ങളുടെ മുഴുവൻ ജീവിതത്തെയും വ്യത്യാസപ്പെടുത്താനുള്ള potential അതിനുണ്ട് എന്ന് ഞാൻ കരുതുന്നു.

ആവശ്യത്തിലിരിക്കുന്നവരുമായി പങ്കുവെക്കുന്നതിനാണ് ദൈവം നിങ്ങൾക്കു ഒരു ജോലി തന്ന് നിങ്ങളെ പ്രാപ്തിപ്പെടുത്തിയിരിക്കുന്നത് എന്ന വിപ്ലവകരമായ ആശയം നമ്മുടെ ഉള്ളിൽ സൂക്ഷിച്ചുകൊണ്ട് ഈ മുന്നു കൽപ്പനകളെ ഓരോന്നായി നമുക്കു വിശകലനം ചെയ്യാം.

ആദ്യമായി, ഈ വേദഭാഗം ന്യായപ്രമാണത്തിലെ എട്ടാമത്തെ കൽപ്പന, ലളിതമായി ആവർത്തിച്ചിരിക്കുന്നു. അതായത് “മോഷ്ടിക്കരുത്”. കള്ളൻ ഇനി കക്കരുത്. ഇനി നമ്മുടെ മോഡൽ വാക്യമായ 22-24 വാക്യത്തിന്റെ വെളിച്ചത്തിൽ മോഷണവും ക്രിസ്ത്യാനിയും എന്നതിനെ സംബന്ധിച്ച് എന്താണ് നമുക്ക് മനസ്സിലാക്കാൻ സാധിക്കുക. ക്രിസ്ത്യാനിയും മോഷണവും എന്ന വിഷയത്തെക്കുറിച്ച് മൂന്നു കാര്യങ്ങൾ ശ്രദ്ധിക്കാം.

ഒന്നാമതായി, മോഷ്ടിക്കുക എന്നത് 22- ാം വാക്യം പ്രകാരം നമ്മുടെ പഴയ മനുഷ്യന്റെ ഭാഗമാണ്. അതിനെ നാം ഉരിഞ്ഞുകളയണം എന്ന കാര്യമാണ് 22- ാം വാക്യത്തിൽ പറയുന്നത്.

മോഷണം, ചതിമോഹങ്ങളാൽ വഞ്ചിക്കപ്പെട്ട ഹൃദയത്തിന്റെ മലിനതയിൽ നിന്നും വരുന്നതാണ്. യഥാർത്ഥത്തിൽ നാം ആയിരിക്കേണ്ട അവസ്ഥയിൽ നിന്ന് വ്യത്യസ്ഥമായി, വഞ്ചിക്കപ്പെടുന്നതിന്റെ ഫലമായി ഒരുവനിൽ സംഭവിക്കുന്നതാണ് മോഷണം എന്നത്.

യേശു മരുഭൂമിയിൽ ആയിരുന്നപ്പോൾ സാത്താൻ വന്ന് യേശുവിനെ പരീക്ഷിച്ചുകൊണ്ട് കല്ല് അപ്പമാക്കുവാനും ക്രുശ് ഒഴിവാക്കി മഹത്വം നേടുവാനും പ്രേരിപ്പിച്ചു. സ്വയം ത്യജിച്ചുകൊണ്ടുള്ള വഴി യേശു ഉപേക്ഷിക്കണം, എന്നിട്ട് തന്റെ ശക്തി ഉപയോഗിച്ച്, എളുപ്പ വഴിയിൽ കാര്യങ്ങളെ നേടണം. കഷ്ടതയുടെ വഴി ത്യജിക്കണം. ഇതായിരുന്നു സാത്താന്റെ പ്രലോഭനം. അതുപോലെ തന്നെ സാത്താൻ വന്ന് നമ്മേയും മോഷ്ടിക്കുവാൻ പ്രലോഭിപ്പിക്കും. എങ്ങനെയൊക്കെ നമുക്കു മോഷ്ടിക്കുവാൻ സാധിക്കും. ഓഫീസിൽ നിന്നു പോരുമ്പോൾ ഓഫീസിൽ ഉപയൊഗിക്കുവാൻ തരുന്ന പേന, സ്റ്റാപളർ എന്നിത്യാജി സാധനങ്ങൾ എടുത്തുകൊണ്ടു പോരുന്നത് മോഷണത്തിൽ പെടുത്താം. ഒരുവന്റെ ന്യായമായ കൂലി കൊടുക്കാതെ പിടിച്ചുവെച്ചുകൊണ്ട് നമുക്കു മോഷ്ടിക്കുവാൻ സാധിക്കും. അന്യസ്റ്റേറ്റുകാരന് കുറഞ്ഞ കൂലി കൊടുത്തുകൊണ്ട് മോഷ്ടിക്കാം. ജോലി സമയത്ത് കൃത്യമായി ജോലി ചെയ്യാതിരുന്നുകൊണ്ട് മോഷ്ടി ക്കാം. അന്യായ കൂലി ആവശ്യപ്പെടുന്നതും മോഷണമാണ്. ഗവണ്മെന്റിനു കൊടുക്കേണ്ട ഇങ്കം-ടാക്സ് കൊടുക്കാതെ ഇരിക്കുന്നതും മോഷണമാണ്, കടകളിൽ നിന്നും സാധനങ്ങൾ കാണാതെ കൈക്കലാക്കുക, ശുദ്ധമനസ്സാക്ഷിയിൽ കാര്യങ്ങളെ ചെയ്യാതിരുക്കുക അങ്ങനെ ഏതു രൂപത്തിലും മോഷണത്തിനുള്ള പ്രലോഭനം നമ്മെ നേരിടാം.

കഴിഞ്ഞ ഒരു ദിവസം ഞാൻ കടയിൽ ചില സാധനങ്ങൾ വാങ്ങാൻ കയറി, സാധനം വാങ്ങി 500 രുപ നോട്ടു കൊടുത്തു. കടക്കാരൻ ബാക്കി തുക മടക്കി നൽകി. എന്നാൽ താഴെ സാധനങ്ങൾക്കിടയിൽ അതാ 100 രൂപ കിടക്കുന്നു. ഞാനത് എടുത്തു. എന്റെ മനസ്സിലേക്ക് അപ്പോൾ വന്ന ചിന്ത, ഞാൻ കാശ് പോക്കറ്റിൽ നിന്നെടുത്തപ്പോൾ താഴെ വീണതാണൊ? ഈ നൂറു രൂപ കടക്കാരന്റെയാണൊ? അതോ സാധനങ്ങൾ വാങ്ങാൻ വന്ന മറ്റൊരാളുടെതാണോ? ഞാൻ ഈ പൈസ എടുത്തത് ആരും കണ്ടില്ല എന്നു മാത്രമല്ല, അതും പോക്കറ്റിൽ ഇട്ടുകൊണ്ട് പോന്നാൽ ആരും അറിയാനും പോകുന്നില്ല. നിമിഷനേരം കൊണ്ട് പല ചിന്തകൾ എന്റെ മനസ്സിൽകൂടി കടന്നു പോയി. ദൈവാത്മാവ് അപ്പോൾ എന്റെ മനസ്സിലേക്ക് കൊണ്ടൂ വന്ന ചിന്ത ഈ വാക്യമായിരുന്നു. ഞാൻ സത്യത്താൽ നടക്കുന്ന വ്യക്തിയാണ്. പെട്ടെന്ന് ഞാൻ ആ നൂറു രൂപ കടക്കാരനെ ഏൽപ്പിച്ച് ഇത് ഇവിടെ കിടന്നു കിട്ടിയതാണ് എന്ന് പറഞ്ഞു. അതല്ലായിരുന്നു എങ്കിൽ കുറ്റബോധം എന്നെ നിരന്തരം വേട്ടയാടുമായിരുന്നു. ദൈവം എന്നെ അതിൽ നിന്നും വിടുവിച്ചു.

മത്തായി 15:19 ഒന്നു വായിക്കാം. അവിടെ കർത്താവു പറയുന്നതു എന്താണ് എന്ന് നോക്കാം : “എങ്ങ്നെയെന്നാൽ ദുശ്ചിന്ത, കൊലപാതകം, വ്യഭിചാരം, പരസംഗം, മോഷണം, കള്ളസാക്ഷ്യം, ദൂഷണം എന്നിവ ഹൃദയത്തിൽ നിന്നു പുറപ്പെട്ടു വരുന്നു." ഈ വക കാര്യങ്ങൾ എവിടെയാണ് ആരംഭിക്കുന്നത്? ഹൃദയത്തിലാണത് ആരംഭിക്കുന്നത്, എന്നിട്ടാണ് അത് പ്രവൃത്തി പഥത്തിലേക്ക് വരുന്നത്. രണ്ടാമതായി, കൊലപാതകം" വ്യഭിചാരം എന്നൊക്കെ കേൾക്കുമ്പോൾ അതൊന്നും എനിക്കു ബാധകമല്ല എന്ന് ചിന്തിച്ചുപോകാനുള്ള സാധ്യത നമുക്കെല്ലാവർക്കുമുണ്ട്. എന്നാൽ കൊലപാതകം" വ്യഭിചാരം എന്നൊക്കെ പറയുമ്പോൾ അതുകൊണ്ട് കർത്താവ് എന്താണ് അർത്ഥമാക്കുന്നത് എന്നു നാം മനസ്സിലാക്കിയാൽ, നാം ഓരോദിവസവും ഈ പാപങ്ങൾ ചെയ്യുന്നുണ്ട് എന്ന് മനസ്സിലാക്കാൻ വിഷമമില്ല. മത്തായി 5:22;28 വായിക്കുക. അന്യനെ കുറിച്ച് പരദൂഷണം പറയുന്നത് പാപമാണെന്ന് ചിന്തിക്കാത്തവർ പോലുമുണ്ട്. പരദൂഷണം അസൂയയിൽ നിന്നു പിറക്കുന്നതാണ്. ആദ്യമെ ഹൃദയത്തിൽ ഒരു വ്യക്തിയോട് വെറുപ്പ് രൂപപ്പെടുന്നു. ആ വ്യക്തിയെ എങ്ങനെയും താറടിക്കണം അതിനുള്ള വഴി പരദൂഷണം പറയുക എന്നതാണ്, ഇവയെല്ലാം ഹൃദയത്തിൽ നിന്നാണ് വരുന്നത്?

വഞ്ചനയാൽ മലിനപ്പെട്ട ഒരു ഹൃദയത്തിൽ നിന്നാണ് മോഷണം ജനിക്കുന്നത്. ക്രിസ്ത്യാനിയും മോഷണവും എന്ന വിഷയത്തെ കുറിച്ച് ആദ്യം പറയാൻ കഴിയുന്ന കാര്യം ഇതാണ്. അത് പഴയ മനുഷ്യന്റെ പ്രകൃതിയാണ്. അത് സുവിശേഷത്താൽ ഉരിഞ്ഞു കളയണം.

രണ്ടാമത്തെ കാര്യം മോഷണത്തിനു പാപക്ഷമ പ്രാപിക്കാൻ കഴിയുമെന്ന കാര്യമാണ്. 28- ാം വാക്യം അതാണ് പറയുന്നത്, അതായത്, കള്ളൻ, പതിവായി മോഷ്ടിച്ചിരുന്നവരും, ഇടക്കൊക്കെ മോഷ്ടിക്കുന്നവരും- നിരാശപ്പെടേണ്ട. പ്രതീക്ഷക്കു വകയുണ്ട് എന്നാണ് പൗലോസ് ഇവിടെ പറയുന്നത്. അവനു പാപക്ഷമ പ്രാപിക്കാൻ സാധിക്കും എന്നതാണ് അവനുള്ള പ്രതീക്ഷ. അതായത്, അവൻ മോഷണം നിർത്തി മാനസാന്തരപ്പെടുക. ചുങ്കക്കാരൻ മത്തായിയെപോലെ, അന്യായമായി പിടിച്ചുവെച്ചത് കൊടുത്തുകൊണ്ട് മാനസാന്തരപ്പെടുക. അങ്ങനെ ചെയ്താൽ അവനു പാപക്ഷമ ലഭിക്കും. അങ്ങനെ നീതിയിലും വിശുദ്ധിയിലും ഒരു പുതിയ ഭാവിയുള്ളവനായി തീരുക. അതിനു സമയം വൈകിയിരിക്കുന്നു എന്നു ചിന്തിക്കേണ്ട ആവശ്യമില്ല, ജീവിതകാലം മുഴുവൻ ഒരു കള്ളനായി ജീവിച്ച്, ഒരു കള്ളനായി ക്രൂശിൽ കയറിയ, കള്ളനെ പോലെ, യേശുവെ, നീ നിന്റെ രാജ്യത്ത് ചെല്ലുമ്പൊൾ എന്നെ കൂടി ഓർക്കേണമെ” എന്ന് (ലൂക്ക് 23:43) പറഞ്ഞാൽ കർത്താവ് അവന്റെ പാപത്തെ ക്ഷമിച്ചു കൊടുക്കും. കാരണം ക്രൂശിന്റെ ശക്തി പാപികളെ രക്ഷിക്കുവാൻ ഇപ്പോഴും മതിയായതാണ്. അതായത്, സുവിശേഷം ക്രിസ്തീയ ജീവിതത്തിന്റെ ABC അല്ല, A-Z ആണ്. സുവിശേഷം മാറ്റിനിർത്തിയുള്ള ഒരു പോക്ക് വിശ്വാസിക്കില്ല.

ഇതാണ് മോഷണത്തക്കുറിച്ച് പറയാൻ കഴിയുന്ന രണ്ടാമത്തെ കാര്യം- മാനസാന്തരപ്പെടുവാൻ മനസ്സുള്ളവർക്കു അതു ക്ഷമിച്ചു കിട്ടും. സുവിശേഷത്തിനു ഇനിയും നിങ്ങളെ വ്യത്യാസപ്പെടുത്തുവാൻ സാധിക്കും. സുവിശേഷത്തിന് അതിനുള്ള ശക്തിയുണ്ട്. അങ്ങനെയുള്ളവരുടെ പാപം ക്ഷമിച്ചു തരാനും മോഷ്ടിക്കാതെ മുന്നൊട്ടു ജീവിക്കുവാനുള്ള ശക്തി സുവിശേഷത്തിനുണ്ട്. അതു കർത്താവു നമുക്ക് നൽകും.

മൂന്നാമതായി, മോഷണത്തെ അതിജീവിക്കുവാൻ വിശ്വാസത്താൽ കഴിയുമെന്ന കാര്യമാണ്. മോഷണത്തെ അതിജീവിക്കുവാൻ വിശ്വാസത്താൽ സാധിക്കും. മോഷണത്തെ അതിജീവിക്കാൻ വിശ്വാസത്തിന്റെ മാർഗ്ഗമല്ലാതെ, മറ്റൊരു വഴിയാണ് നിങ്ങൾ അന്വേഷിക്കുന്നത് എങ്കിൽ അതു കുറച്ചു കാലത്തേക്കെ നിങ്ങളെ ജയിലിൽ നിന്നു മാറ്റി നിർത്തുകയുള്ളു, അതിന്റെ പ്രയോജനം കുറച്ചു കാലത്തേക്കു മാത്രമെ സമൂഹത്തിനും ലഭിക്കുകയുള്ളു. എന്നാൽ അത് അവനെ നരകത്തിൽ നിന്നും രക്ഷിക്കുകയില്ല. അതുകൊണ്ട് നിത്യതയോട് തുലനപ്പെടുത്തുമ്പോൾ അതു ലാഭകരമല്ല, അത് നിങ്ങൾക്ക് നിങ്ങളോടു തന്നെ സ്നേഹമില്ല എന്നാണ് കാണിക്കുന്നത്.

ദൈവത്തിന്റെ വിശുദ്ധിയെക്കുറിച്ചുള്ള ബോദ്ധ്യം ഒരുവനെ എപ്പോഴും ഭരിച്ചുകൊണ്ടിരിക്കണം. ഹെബ 5:8-9 ൽ എന്താണ് പറയുന്നതു എന്നു നോക്കാം : “പുത്രൻ എങ്കിലും താൻ അനുഭവിച്ച കഷ്ടങ്ങളാൽ അനുസരണം പഠിച്ചു തികഞ്ഞവനായി തന്നെ അനുസരിക്കുന്ന ഏവർക്കും നിത്യരക്ഷയുടെ കാരണഭൂതനായിത്തീർന്നു." ആ അനുസരണത്തിനായി കഷ്ടം സഹിക്കേണ്ടിവന്നാലും അത് ഒരു നഷ്ടമല്ല. ദൈവത്തിന്റെ പരിശുദ്ധാത്മാവിനാൽ, സുവിശേഷ ഉപദേശത്തിന്റെ ഫലമായി ഉളവായ, ആന്തരീക രൂപാന്തരത്തിന്റെ ഫലമായി വരുന്ന അനുസരണം ആകണം ഒരു വ്യക്തിയിൽ ഉണ്ടാകേണ്ടത്. 24 ൽ പറയുന്ന പുതിയ മനുഷ്യൻ നീതിയിലും വിശുദ്ധിയിലും ദൈവാനുരൂപമായി സൃഷ്ടിക്കപ്പെട്ട പുതിയ മനുഷ്യനാണ്. അതാണ് അവനെ മോഷണത്തിൽ നിന്നു പിന്തിരിപ്പിക്കുന്നത്.

യോഹന്നാൻ 8:32- ാം വായിക്കുന്നത് ഇപ്രകാരമാണല്ലൊ “സത്യം അറിയുകയും സത്യം നിങ്ങളെ സ്വതന്ത്രരാക്കുകയും ചെയ്യും”

കള്ളനെ കക്കാനുള്ള പ്രവണതയിൽ നിന്നു മോചിപ്പിക്കുവാൻ സത്യത്തിനു സാധിക്കും. അതിനു ദൈവം ഉപയോഗിക്കുന്ന സത്യമെന്താണ്? അനേകം സത്യങ്ങൾ ദൈവവചനത്തിൽ കാണുവാൻ കഴിയും. ഉദാഹരണത്തിനു ഹെബ 13:5-6 “നിങ്ങളുടെ നടപ്പ് ദ്രവ്യാഗ്രഹമില്ലാത്തതായിരിക്കട്ടെ; ഉള്ളതുകൊണ്ട് തൃപ്തിപ്പെടുവിൻ; ഞാൻ നിന്നെ ഒരുനാളും കൈവിടുകയില്ല, ഉപേക്ഷിക്കുകയുമില്ല" എന്നു അവൻ തന്നേ അരുളിച്ചെയ്തിരിക്കുന്നുവല്ലോ. ആകയാൽ "കർത്താവു എനിക്കു തുണ; ഞാൻ പേടിക്കയില്ല; മനുഷ്യൻ എന്നോടു എന്തു ചെയ്യും" എന്നു നമുക്കു ധൈര്യത്തോടെ പറയാം" t'k rak[k ssPu+=S^lsm eyulA” മോഷ്ടിക്കണമെന്ന് തോന്നുമ്പോൾ ഈ വാക്യം നമ്മുടെ ഹൃദയത്തിൽ ഉണ്ടെങ്കിൽ ഈ സത്യം നമ്മെ മോഷണത്തിൽ നിന്നു പിന്തിരിപ്പിക്കും. വസ്തുക്കളോടൂള്ള മോഹവും ദൈവത്തിന്റെ വാഗ്ദത്തത്തിലുള്ള അവിശ്വാസവുമാണ് ഒരുവനെ മോഷ്ടിക്കുവാൻ പ്രേരിപ്പിക്കുന്നത്.

സങ്കീ. 50.10 “കാട്ടിലെ സകലമൃഗവും പർവ്വതങ്ങളിലെ ആയിരമായിരം ജന്തുക്കളും എനിക്കുള്ളവയാകുന്നു."

DNA തുടങ്ങി Milkey way വരെയൂള്ള സകല സംഗതികളും ദൈവത്തിന്റെ ജ്ഞാനത്താൽ സൃഷ്ടിക്കപ്പെട്ടതും തന്റെ നിയന്ത്രണത്തിൻ കീഴിൽ ചരിക്കുന്നതുമാകുന്നു. ആകാശത്തിലെ ഒരു കുരുകിലൊ, തലയിലെ ഒരു രോമമൊ പൊഴിഞ്ഞാൽ അറിയുന്നവനും, തന്റെ ഏകജാതനായ പുത്രനെ നമുക്കു വേണ്ടി ബലി നൽകാൻ തയ്യാറായതും ആയ കർത്താധി കർത്താവായ ദൈവം പറയുന്നു “ഞാൻ നിങ്ങളെ കൈവിടുകയുമില്ല, ഉപേക്ഷിക്കുകയുമില്ല” എന്ന്. ഇതു നാം വാസ്തവത്തിൽ വിശ്വസിക്കുന്നുണ്ടോ?

ഇതു വിശ്വസിക്കയും അതേ സമയം അൽപ്പം സന്തോഷത്തിനൊ, സുരക്ഷിതത്തിനൊ വേണ്ടി മോഷ്ടിക്കുകയും ചെയ്യുന്നത് എത്ര വൈരുദ്ധ്യമാണ് എന്ന് ഓർക്കുക. സങ്കീ 16:11 ൽ നാം എന്താണ് വായിക്കുന്നത് : “ജീവന്റെ വഴി നീ എനിക്കു കാണിച്ചുതരും; നിന്റെ സന്നിധിയിൽ സന്തോഷ പരിപൂർണ്ണതയും നിന്റെ വലതു ഭാഗത്തു എന്നും പ്രമോദങ്ങളും ഉണ്ട്."

മൂന്നാമത്തെ കാര്യം വിശ്വാസത്താൽ നമുക്ക് മോഷണത്തെ അതിജീവിക്കുവാൻ സാധിക്കും എന്ന കാര്യമാണ്. അതിനെ വിശ്വാസത്താലാണ് നാം അതിജീവിക്കേണ്ടത്.

നാം വായിച്ച വേദഭാഗത്തിലെ ഒന്നാമത്തെ കൽപ്പന എന്നു പറയുന്നത് മോഷ്ടിക്കരുത്, വിശ്വാസത്താൽ ജീവിക്കുക, ദൈവത്തിന്റെ വാഗ്ദത്തങ്ങളിൽ വിശ്വസിക്കുക.!

അതായത്, മോഷണം ചതി മോഹങ്ങളാൽ മലിനപ്പെട്ട പഴയമനുഷ്യന്റെ പ്രകൃതമാണ്. അതിനെ ഉരിഞ്ഞു കളയുക, മാനസാന്തരപ്പെട്ട് കർത്താവിലേക്ക് തിരിയുക. തുടർന്നുള്ള ജീവിതം വിശ്വാസത്താൽ ജീവിക്കുക.