ഇനി യേശുവിന്റെ വിളിയുടെ ചില പ്രത്യേകതകൾ എന്തൊക്കെയാണെന്ന് നമുക്കു നോക്കാം. ഫലവത്തായ വിളി എന്നത് ദൈവവചനത്തിൽ കാണുന്ന ഒരു യാഥാർത്ഥ്യമാണ്. മഹാനായ സ്പർജ്ജൻ ഫലവത്തായ വിളിയുടെ 7 സവിശേഷതകളെ ക്കുറിച്ചു പറഞ്ഞിരിക്കുന്നത് ഞാൻ നിങ്ങളുടെ ശ്രദ്ധയിലേക്കു കൊണ്ടുവരുവാൻ ആഗ്രഹിക്കുന്നു. യേശുവിന്റെ വിളി:

1. വ്യക്തിപരമായ വിളി ആയിരുന്നു. ഒരു പക്ഷെ ആ മരത്തിൽ മറ്റു പലരും സ്ഥാനം പിടിച്ചിട്ടുണ്ടാകാം. അതിൽ നിന്നു സക്കായിയെ മാത്രമാണീ കർത്താവ് വിളിക്കുന്നത്.
2. യേശു സക്കായിയെ പേർ ചൊല്ലി വിളിക്കുന്നു. ഇറങ്ങിവരുവാൻ ആവശ്യപ്പെടുന്നു. നിരസിക്കുവാൻ കഴിയാത്ത വിളിയാണത്.
3. തന്റെ ഹൃദയത്തെ സോഫ്റ്റ് ആക്കുന്ന വിളിയായിരുന്നു. ഹൃദയകാഠിന്യത്താൽ അജ്ഞതയും അന്ധതയും ബാധിച്ചവർ ജീവനിൽ നിന്ന് അകന്നവരാണ് (എഫെ 4:17-18). അതൊക്കേയും നീക്കി ഹൃദയത്തെ വളരെ മാർദ്ദവമുള്ളതാക്കി തീർക്കുന്ന ഒരു വിളിയാണ് യേശുവിന്റെ വിളി.
4. തിടുക്കത്തിൽ പ്രതികരിക്കുവാനുള്ള വിളിയായിരുന്നു. സക്കായി മരത്തിൽ നിന്നു തിടുക്കത്തിൽ ഇറങ്ങിവരുന്നു.
5. താഴ്മ ധരിക്കാനുള്ള വിളിയായിരുന്നു. പരീശന്മാരെപ്പോലെ തങ്ങൾക്ക് യേശുവിനെക്കൊണ്ട് പ്രത്യേകിച്ചൊരു നേട്ടവുമില്ല എന്ന് സക്കായി ചിന്തിച്ചില്ല. താൻ തന്നെത്തന്നെ താഴ്ത്തി.
6. സ്നേഹത്തോടെയുള്ള വിളിയായിരുന്നു. ഇന്നു ഞാൻ നിന്നോടുകൂടെ പാർക്കേണ്ടതാകുന്നു.
7. കൂടെ വസിക്കുവാനുള്ള വിളിയായിരുന്നു. യേശു അവനോടും അവൻ യേശുവിനോടും കൂടെ വസിക്കുവാനുള്ള ഒരു വിളി ആയിരുന്നു.
8. തന്റെ വിളി ഫലം പുറപ്പെടുവിക്കുന്ന വിളിയായിരുന്നു. സ്ക്കായിയിൽ വന്ന രുപാന്തരം 180 ഡിഗ്രി ടേണിംഗായിരുന്നു. താൻ തന്റെ വീടു തുറന്നുകൊടുത്തു, തന്റെ മേശ യേശുവിനായി ഒരുക്കി, തന്റെ കൈ കഴുകുന്നു, ഒത്തൊരുമിച്ചു ഭക്ഷണം കഴിക്കുന്നു, തന്റെ ഹൃദയം തുറക്കപ്പെടുന്നു. തന്റെ ഹൃദയം വിശാലമാക്കപ്പെടുന്നു. തന്റെ മനസ്സാക്ഷി ശുദ്ധമാക്കപ്പെടുന്നു. എല്ലാത്തിലും ഉപരി ഹൃദയത്തിൽ സന്തോഷം. തന്റെ മനസ്സാക്ഷിക്കുത്ത് എന്നേക്കുമായി നീങ്ങി. കർത്താവിന്റെ നീതി അവന്മേൽ കണക്കിട്ടപ്പോൾ തന്റെ അശുദ്ധി നീങ്ങി. തന്റെ ഹൃദയം സ്പടിക തുല്യം നിർമ്മലമായി തീർന്നു, അതിന്റെ സന്തോഷം അവന്റെ മുഖത്ത് ദൃശ്യമായി. “കർത്താവേ, എന്റെ വസ്തു വകയിൽ പാതി ഞാൻ ദരിദ്രർക്കു കൊടുക്കുന്നുണ്ട്; വല്ലതും ചതിവായി വാങ്ങിയിട്ടുണ്ടെങ്കിൽ നാല് മടങ്ങി മടക്കി കൊടുക്കുന്നു എന്ന് പറഞ്ഞു.” സക്കായിയുടെ മാനസാന്തരം ശരിയായ മാനസാന്തരമായിരുന്നു എന്നതിന്റെ ഏറ്റവും വലിയ തെളിവും കൂടിയാണ് 8-നാം വാക്യം.

നാം യേശുവിനോടുകൂടെ വസിക്കുമ്പോൾ നമ്മിലും പല മാറ്റങ്ങൾ സംഭവിക്കുന്നു. യേശുക്രിസ്തുവിനോടൂ കുടെ സമയം ചിലവഴിച്ചിട്ട് ഒരുമാറ്റവും സംഭവിക്കാതിരിക്കുന്നത് അസംഭവ്യമായ സംഗതിയാണ്.

എന്നാൽ ഇങ്ങനെയൊരു വിളി ഇല്ലാതിരുന്ന ധനവാനായ യുവപ്രമാണിയോട് കർത്താവ് 18:22 ൽ പറഞ്ഞു “യേശു: ഇനി ഒരുകുറവു നിനക്കുണ്ടു; നിനക്കുള്ളതൊക്കെയും വിറ്റു ദരിദ്രന്മാർക്കു പകുത്തുകൊടുക്ക; എന്നാൽ സ്വർഗ്ഗത്തിൽ നിനക്കു നിക്ഷേപം ഉണ്ടാകും; പിന്നെ വന്നു എന്നെ അനുഗമിക്ക എന്നു പറഞ്ഞു; എന്നാൽ സ്വർഗ്ഗത്തിൽ നിനക്കു നിക്ഷേപം ഉണ്ടാകും; പിന്നെ വന്നു എന്നെ അനുഗമിക്ക എന്നു പറഞ്ഞു.” എന്നാൽ അവന്റെ പ്രതികരണം എപ്രകാരമായിരുന്നു നോക്കുക. അവ തമ്മിലുള്ള അന്തരം നോക്കുക യുവപ്രമാണിയൊട് യേശു ചെയ്യാൻ ആവശ്യപ്പെട്ടിട്ടും ചെയ്യാത്ത കാര്യം, സക്കായി കർത്താവ് ആവശ്യപ്പെടാതെ ഇതെല്ലാം ചെയ്യുന്നു. ഇതാണ് ദൈവകൃപയാൽ ഉണ്ടാകുന്ന മാനസാന്തരം.

സക്കായി രക്ഷിക്കപ്പെട്ടു എന്നത് അവന്റെ വാക്കുകളിൽ നിന്നും പ്രവൃത്തികളിൽ നിന്നും വ്യക്തമാണ്. “കർത്താവേ, എന്റെ വസ്തു വകയിൽ പാതി ഞാൻ ദരിദ്രർക്കു കൊടുക്കുന്നുണ്ട്; വല്ലതും ചതിവായി വാങ്ങിയിട്ടുണ്ടെങ്കിൽ നാല് മടങ്ങി മടക്കി കൊടുക്കുന്നു എന്ന് പറഞ്ഞു.” ദൈവത്തിന്റെ പരിശുദ്ധാത്മാവിൽ അല്ലാതെ യേശുവിനെ ഒരുവനു കർത്താവേ എന്നു വിളിക്കുവാൻ കഴിയുകയില്ല. ദൈവവുമായി ഒരു ഉടമ്പടി ബന്ധത്തെ കാണിക്കുന്ന ഒരു വിളിയാണ്. തന്നെ വിളിച്ച യേശുവിനെ തന്റെ കർത്താവായി അംഗീകരിക്കുന്ന വിളിയാണ് സക്കായിയുടെ വിളി.

രണ്ടാമതായി, താൻ ദൈവമായി ആരാധിച്ച പണത്തെ, തനിക്കു വിഗ്രഹമായിരുന്ന പണത്തെ ത്യജിച്ച് ആ സ്ഥാനത്ത് യേശുവിനെ താൻ പ്രതിഷ്ഠിക്കുന്നു. സക്കായി ഒരു പരസ്യമായ ഏറ്റു പറച്ചിൽ നടത്തുന്നു. ഞാൻ അന്യായമായി പിടിച്ചു പറിച്ചത് നാലു മടങ്ങായി തിരികെ കൊടുക്കും. ന്യായപ്രമാണം 1/5 കൂട്ടിക്കൊടുക്കാനെ പറയുന്നുള്ളു. എന്നാൽ സക്കായി നാലു മടങ്ങ് കൊടുക്കുവാൻ തയ്യാറാകുന്നു. ഞാൻ ദരിദ്രനെ പരിഗണിക്കും. തനിക്ക് ഇതിനു മുൻപ് അങ്ങനെയൊരു പരിഗണന ഇല്ലായിരുന്നു. കാരണം ജനങ്ങൾ അവനെ പാപികളുടെ ഗണത്തിൽ ആയിരുന്നു കണ്ടിരുന്നത്.

താൻ അതിലൂടെ ഒരു ഭോഷത്വപരമായ പ്രവർത്തിയാണൊ ചെയ്തത്? തനിക്കൊരു കുടുംബമുണ്ടായിരുന്നെങ്കിൽ താൻ അവരെക്കുറിച്ച് ചിന്തിക്കാതെ ഭോഷത്വപരമായി പ്രവർത്തിച്ചൊ? ഇല്ല. സക്കായി ഇപ്പോഴാണ് മറഞ്ഞിരുന്ന നിധി, വിലയേറിയ മുത്ത് അതായത് യേശുക്രിസ്തുവിനെ കണ്ടെത്തിയത്. ആകാശത്തിലെ പറവയേയും, വയലിലെ തമരയെയും പുലർത്തുന്ന ദൈവം തന്നെ പുലർത്തുവാൻ മതിയായവൻ എന്ന് തനിക്കു ബോദ്ധ്യം വന്നതിൽ നിന്നുളവായതാണത്. യുവപ്രമാണിക്കു ബോദ്ധ്യം വരാതിരുന്ന കാര്യവും ഇതുതന്നെ ആയിരുന്നു. യേശുക്രിസ്തുവിൽ നിന്നും അങ്ങനെ വിറ്റു ദരിദ്രർക്കു കൊടുക്കണമെന്നൊ നാലു മടങ്ങ് മടക്കിക്കൊടുക്കണമെന്നൊ ഒരാവശ്യം ഉണ്ടായിരുന്നില്ല. യേശുവിൽ താൻ തന്റെ സമ്പത്ത് കണ്ടെത്തിയതു കൊണ്ടാണ് താനങ്ങനെ ചെയ്തത്. യേശുക്രിസ്തുവുമായി സന്ധിക്കുമ്പോൾ എത്ര മനോഹരമായ വ്യതിയാനമാണ് ഒരുവനിൽ വന്നു ഭവിക്കുന്നത്.

a) യേശു സക്കായിയുടെ രക്ഷ ഉറപ്പു വരുത്തുന്നു.

“"ഇവനും അബ്രഹാമിന്റെ മകൻ ആകയാൽ ഈ വീട്ടിനു രക്ഷ വന്നു. കാണാതെ പോയതിനെ തിരഞ്ഞ് രക്ഷിപ്പാൻ അല്ലോ മനുഷ്യ പുത്രൻ വന്നതു" എന്ന് പറഞ്ഞു." (19:9). ഇതാണ് വലിയ രക്ഷ എന്നു പറയുന്നത്. പലരും പണം, ആരോഗ്യം, അധികാരം, പദവി എന്നിവയുടെ വെളിച്ചത്തിലാണ് രക്ഷയെ കാണുന്നത്. സമ്പത്ത്, ആരോഗ്യം ജോലി, വിവാഹം, പ്രാർത്ഥനക്കു ഉത്തരം കിട്ടി എന്നൊക്കെ പറഞ്ഞുകൊണ്ട് അനേകരും തങ്ങൾ സ്വർഗ്ഗത്തിൽ പോകും എന്ന് ചിന്തിച്ചു കഴിയുന്നവരുണ്ട്. നമുക്കു ചുറ്റുപാടും യേശുവിനെ കൂടാതെ ജീവിക്കുന്ന ആളുകളിലേക്ക് നാം നോക്കിയാലും ഈ കാര്യങ്ങൾ അവരിലും ശരിയാണ് എന്ന് കാണുവാൻ കഴിയും. ദൈവമില്ല എന്നു പറഞ്ഞു നടക്കുന്നവർക്കുപോലും ലോകത്തിന്റെ പണവും പ്രശസ്തിയും അധികാരവും അംഗീകാരവും ഒക്കെ ലഭിക്കുന്നുണ്ട്. അതു ആത്മരക്ഷയുമായി കൂട്ടിക്കുഴക്കരുത്. രക്ഷ എന്നത് ആത്മാവിന്റെയും ശരീരത്തിന്റേയും രക്ഷയാണ്. ഒരുവൻ സർവ്വലോകവും നേടീട്ട് തന്റെ ആത്മാവ് നഷ്ടപ്പെട്ടാൽ അവനു എന്തു ഗുണം? അവന്റെ ആത്മാവിനു പകരമായി എന്തു മറുവില കൊടുക്കും? രക്ഷ എന്നു പറയുന്നത് നിത്യ നരകത്തിൽ നിന്നു ആത്മാവും ശരീരവും വിടുതൽ പ്രാപിക്കുന്നതാണ്. നിങ്ങൾ രക്ഷ പ്രാപിച്ച വ്യക്തി ആണെങ്കിൽ നിങ്ങൾ ദൈവസന്നിധിയിലേക്കാണ് കടന്നു പോകുന്നത്. അവിടെ ദൈവത്താൽ ആശ്വസിപ്പിക്കപ്പെട്ടവരായി തീരും. പരിശുദ്ധാത്മാവിനാൽ എന്നും നീതിയിലും സ്മാധാനത്തിലും സന്തോഷത്തിലും അവനോടു കൂടെ ജീവിക്കും. ഈ രക്ഷയാണ് സക്കായി പ്രാപിച്ചതും യേശു ഉറപ്പു നൽകിയതും.