നമുക്ക് യേശുവിന്റെ സ്നാനത്തിൽ നിന്ന് ആരംഭിക്കാം. 9-ാം വാക്യം: “ആ കാലത്തു യേശു ഗലീലയിലെ നസറെത്തിൽ നിന്നു വന്നു യോഹന്നാനാൽ യോർദ്ദാനിൽ സ്നാനം കഴിഞ്ഞു” (മർക്കോസ് 1: 9) യോഹന്നാനെക്കാൾ വലിയവനായ യേശു, യോഹന്നാന്റെ കൈക്കീഴിൽ സ്നാനം ഏല്ക്കുവാൻ ഗലീലിയിൽനിന്നു യോർദ്ദാനിലേക്കു വരുന്നു.

യേശുവിന്റെ ചെരുപ്പ് അഴിക്കാൻ പോലും യോഗ്യനല്ലെന്നു തോന്നിയ യോഹന്നാൻ എന്തുകൊണ്ടാണ് യേശുവിനെ സ്നാനപ്പെടുത്തുന്നത്? കൂടാതെ, യോഹന്നാന്റെ സ്നാനം “പാപമോചനത്തിനുള്ള മാനസാന്തര”സ്നാനമാണെന്ന് നാം കണ്ടു. യേശു പാപരഹിതനായിരുന്നുവെങ്കിൽ പിന്നെ എന്തിനാണ് സ്നാനം ഏറ്റത്? ഈ ചോദ്യങ്ങൾക്കുള്ള ഉത്തരങ്ങൾ ഈ വാക്യങ്ങളിലും പിന്നീടങ്ങോട്ടുള്ള അദ്ധ്യായങ്ങളിലും വെളിപ്പെട്ടിരിക്കുന്നു.

യേശുവിന്റെ സ്നാനം യേശുവിന്റെ സത്വവും (Identity) അവന്റെ ദൗത്യവുമായി ബന്ധപ്പെട്ടിരിക്കുന്നു. അവന്റെ സത്വത്തെ സംബന്ധിച്ചിടത്തോളം, അവന്റെ സ്നാനം അവനെ രക്ഷകനായും ക്രിസ്തുവായും ദൈവപുത്രനായും വെളിപ്പെടുത്തുന്നു. യേശുവിന്റെ സ്നാനത്തിൽ നടക്കുന്ന ത്രിവിധമായ സാക്ഷ്യങ്ങൾ ഈ ത്രിവിധമായ തിരിച്ചറിയൽ നൽകുന്നു. സ്നാനം സ്വീകരിക്കുന്നതിൽ യേശുവിന്റെതന്നെ സാക്ഷ്യമുണ്ട്. സ്നാനത്തെത്തുടർന്ന് പരിശുദ്ധാത്മാവിന്റെയും പിതാവായ ദൈവത്തിന്റെയും സാക്ഷ്യമുണ്ട്. അതിനാൽ, ത്രീയേക ദൈവത്തിലെ പിതാവ്, പുത്രൻ, പരിശുദ്ധാത്മാവ് എന്നിവരെല്ലാം ക്രിസ്തുവിന്റെ സ്നാനത്തിൽ സജീവമായി പങ്കാളികളാകുന്നു. മൂന്നുപേരും രക്ഷകനും ക്രിസ്തുവും ദൈവപുത്രനുമെന്ന യേശുവിന്റെ സ്വത്വത്തിന് സാക്ഷ്യം വഹിക്കുന്നു.

A) യേശുവിന്റെ സാക്ഷ്യം - താനാണ് രക്ഷകൻ

ഒന്നാമതായി, യേശുവിന്റെ സാക്ഷ്യം പരിശോധിക്കാം. യേശുവിന്റെ ചെരുപ്പ് അഴിക്കാൻ യോഹന്നാന് അർഹതയില്ലെങ്കിൽ, പിന്നെ എന്തിനാണ് അവനെ സ്നാനപ്പെടുത്തുന്നത്? മാർക്കോസ് ആ ചോദ്യത്തിന് പ്രത്യേകമായി ഉത്തരം നമുക്ക് നൽകുന്നില്ല, പക്ഷേ മത്തായിയുടെ സുവിശേഷം നോക്കുമ്പോൾ നമുക്ക് ഈ കാര്യത്തിൽ കുറച്ചുകൂടി ഉൾക്കാഴ്ച ലഭിക്കും. മത്തായി 3 ൽ നാം കാണുന്നത്: "യോഹന്നാനോ അവനെ വിലക്കി: നിന്നാൽ സ്നാനം ഏല്ക്കുവാൻ എനിക്കു ആവശ്യം; പിന്നെ നീ എന്റെ അടുക്കൽ വരുന്നുവോ എന്നു പറഞ്ഞു. 15 യേശു അവനോടു: “ഇപ്പോൾ സമ്മതിക്ക; ഇങ്ങനെ സകലനീതിയും നിവർത്തിക്കുന്നതു നമുക്കു ഉചിതം എന്നു ഉത്തരം പറഞ്ഞു”; എന്നാറെ അവൻ അവനെ സമ്മതിച്ചു" (മത്തായി 3: 14-15). സകല നീതിയും നിവൃത്തിക്കുന്നതിനുവേണ്ടിയാണ് യേശു സ്നാനം സ്വീകരിച്ചത്.
അതെ, യേശുവിനെ സ്നാനപ്പെടുത്തുവാൻ താൻ അനർഹനാണെന്ന് യോഹന്നാനും തോന്നി, പക്ഷേ അതിൽ കുഴപ്പമില്ലെന്ന് യേശു അവനു ഉറപ്പുനൽകി.

എന്തുകൊണ്ടാണ് യോഹന്നാൻ സ്നാനപ്പെടുത്തിയത്, പ്രത്യേകിച്ചും യോഹന്നാന്റെ സ്നാനം “പാപമോചനത്തിനായുള്ള മാനസാന്തരത്തിന്റെ സ്നാനം” ആയിരുന്നപ്പോൾ? ഏറ്റുപറയാൻ യേശുവിന് പാപമില്ല, അതിനാൽ അവന് പാപമോചനം ആവശ്യമില്ല. പിന്നെ എന്തുകൊണ്ടാണ് യോഹന്നാനാൽ സ്നാനം സ്വീകരിക്കുന്നത്? മൂന്ന് പ്രത്യേക കാരണങ്ങളാൽ യേശു സ്നാനമേറ്റു: 1) നമ്മോട് identify ചെയ്യുക, അല്ലെങ്കിൽ താദാമ്യം പ്രാപിക്കുക, 2) നമ്മോടുള്ള തന്റെ mission അഥവാ ദൗത്യം വെളിപ്പെടുത്തുക, 3) നമുക്ക് ഒരു മാതൃക നൽകുക.

ഒന്നാമതായി, നമ്മോടു താദാമ്യപ്പെടാൻ യേശു സ്നാനമേറ്റു. യേശു വന്നത് “പാപിയായ മനുഷ്യന്റെ സാദൃശ്യത്തിലാണ്” എന്ന് റോമർ പുസ്തകം പറയുന്നു. (റോമർ 8: 3) അതിനർത്ഥം അവന് സ്വന്തമായി എന്തെങ്കിലും പാപമുണ്ടെന്നല്ല, മറിച്ച് അവൻ നമ്മുടെ സാദൃശ്യത്തിലാണ് വന്നത് - മറ്റാരെയും പോലെ പ്രലോഭനത്തിനും ബലഹീനതയ്ക്കും വിധേയമായ ഒരു യഥാർത്ഥ മനുഷ്യശരീരവുമായി യേശു വന്നു. നമ്മുടെ പാപങ്ങൾ സ്വന്തം ശരീരത്തിൽ വഹിക്കാനാണ് അവൻ വന്നതെന്ന് 1 പത്രോസിന്റെ പുസ്തകം പറയുന്നു. (1 പത്രോസ് 2:24), 2 കൊരിന്ത്യർ 5 തിരിച്ചറിയൽ കൂടുതൽ ശക്തമാക്കുന്നു: “21 പാപം അറിയാത്തവനെ, നാം അവനിൽ ദൈവത്തിന്റെ നീതി ആകേണ്ടതിന്നു, അവൻ നമുക്കു വേണ്ടി പാപം ആക്കി” (2 കൊരിന്ത്യർ 5:21)

അതിനാൽ, യോർദ്ദാൻ നദിയിൽ ഏറ്റുപറയാൻ ക്രിസ്തുവിന് സ്വന്തമായി ഒരു പാപവുമില്ലെങ്കിലും, അവൻ നമ്മോട് ശക്തമായി ഏകീഭവിക്കുന്നതിന്റെ ഭാഗമായി സ്നാനമേറ്റു, അവൻ നമ്മുടെ പാപങ്ങളെ ക്രൂശിൽ ഏറ്റെടുക്കും. മറ്റൊരു വിധത്തിൽ പറഞ്ഞാൽ, യേശു തന്റെ പാപങ്ങൾക്കായി സ്നാനമേറ്റില്ല; നമ്മുടെ പാപങ്ങൾ നിമിത്തം അവൻ സ്നാനമേറ്റു.

യേശു നമ്മോടുള്ള തന്റെ ദൗത്യം പ്രകടമാക്കുന്നതിന് സ്നാനമേറ്റു. യേശു ഭൂമിയിലേക്കു വന്നത് നമ്മുടെ മേൽ കർത്തൃത്വം നടത്താനല്ല മറിച്ച് നമ്മോടു താദാമ്യം പ്രാപിച്ചുകൊണ്ട്, അവന്റെ ജീവൻ നമുക്കുവേണ്ടി ഒരു മറുവിലയായി നൽകാൻ വേണ്ടിയാണ്. (മർക്കോസ് 10:45) ക്രൂശിലെ മരണത്തെ യേശു തന്റെ സ്നാനം എന്നാണ് വിശേഷിപ്പിച്ചത്. .

സ്നാനം യേശുക്രിസ്തുവിന്റെ മരണത്തെയും പുനരുത്ഥാനത്തെയും പ്രതിനിധീകരിക്കുന്ന മനോഹരമായ ഒരു ശുശ്രൂഷയാണ്. ഒരു വ്യക്തി വെള്ളത്തിനടിയിൽ പോകുമ്പോൾ, അത് മരണത്തിന്റെയും ശ്മശാനത്തിന്റെയും ചിത്രമാണ്; വ്യക്തി വെള്ളത്തിൽ നിന്ന് പുറത്തുവരുമ്പോൾ അത് പുനരുത്ഥാനത്തിന്റെയും- പുതിയ ജീവിതത്തിന്റെയും ചിത്രം നമുക്കു നൽകുന്നു. മരണത്തിന്റേയും പുനരുത്ഥാനത്തിന്റേയും ഈ ചിത്രം റോമാലേഖനം വിവരിക്കുന്നതിപ്രകാരമാണ്: “4 അങ്ങനെ നാം അവന്റെ മരണത്തിൽ പങ്കാളികളായിത്തീർന്ന സ്നാനത്താൽ അവനോടുകൂടെ കുഴിച്ചിടപ്പെട്ടു; ക്രിസ്തു മരിച്ചിട്ടു പിതാവിന്റെ മഹിമയാൽ ജീവിച്ചെഴുന്നേറ്റതുപോലെ നാമും ജീവന്റെ പുതുക്കത്തിൽ നടക്കേണ്ടതിന്നു തന്നേ.” (റോമർ 6: 4)

യേശു സ്നാനമേറ്റ മൂന്നാമത്തെ കാരണം : നമുക്ക് ഒരു മാതൃകയായി തീരുവാൻ വേണ്ടിയാണ്. തന്റെ സ്നാനത്തിൽ യേശു നമ്മോടു താദാമ്യം പ്രാപിച്ചതുപോലെ, നമ്മുടെ സ്നാനത്തിൽ നാമും അവനോടു താദാമ്യം പ്രാപിക്കണം. യേശുവിന്റെ നാമത്തിൽ നാം സ്നാനമേൽക്കുമ്പോൾ, യേശുക്രിസ്തുവിലുള്ള നമ്മുടെ വിശ്വാസത്തിന് നാം സാക്ഷ്യം വഹിക്കുന്നു, നാം നമ്മുടെ പഴയ മനുഷ്യനെ മരിപ്പിക്കുകയും ക്രിസ്തുവിലൂടെ പുതിയ ജീവൻ പ്രാപിക്കുകയും ചെയ്യുന്നു. ക്രിസ്തുവിന്റെ മരണത്തിലും പുനരുത്ഥാനത്തിലും നാം ഐക്യപ്പെട്ടിട്ടിരിക്കുന്നു എന്നത് പൊതുസ്നാനത്തിലൂടെ നാം ലോകത്തോട് വിളിച്ചു പറയുന്നു.
നമ്മുടെ സ്നാനം നമ്മുടെ വിശ്വാസത്തിന്റെ പരസ്യ പ്രഖ്യാപനമാണ്, അതുപോലെ തന്നെ യേശുവിന്റെ സ്നാനം നമ്മുടെ പാപങ്ങളാൽ തിരിച്ചറിഞ്ഞുവെന്നും നമ്മുടെ പാപങ്ങൾക്കായി ക്രൂശിൽ മരിക്കുമെന്നുമുള്ള പരസ്യമായ സാക്ഷ്യമായിരുന്നു. ഫലത്തിൽ, താൻ രക്ഷകനായി വന്നിരിക്കുന്നു എന്നതിന്റെ സാക്ഷ്യമാണ് യേശുവിന്റെ സ്നാനം. “യേശു” എന്ന പേരിന്റെ അർത്ഥംപോലും “രക്ഷകൻ” എന്നാണ്. യേശുവിന്റെ ജനനത്തെക്കുറിച്ച് ദൂതൻ യോസേഫിനോട് പറഞ്ഞു, “അവൻ (യേശു) തന്റെ ജനത്തെ അവരുടെ പാപങ്ങളിൽ നിന്നു രക്ഷിപ്പാനിരിക്കകൊണ്ടു നീ അവന്നു യേശു എന്നു പേർ ഇടേണം എന്നു പറഞ്ഞു.” (മത്തായി 1:21)

B. ആത്മാവിന്റെ സാക്ഷ്യം - യേശു ക്രിസ്തുവാണ്

രണ്ടാമതായി, അവൻ ക്രിസ്തുവാണെന്ന ആത്മാവിന്റെ സാക്ഷ്യമാണ്. 10-ാം വാക്യം നോക്കുക: “യേശു 10 വെള്ളത്തിൽ നിന്നു കയറിയ ഉടനെ ആകാശം പിളരുന്നതും ആത്മാവു പ്രാവുപോലെ തന്റെ മേൽ വരുന്നതും കണ്ടു:” (മർക്കോസ് 1:10). യേശുവിന്റെ സ്നാനം വളരെ പ്രാധാന്യമർഹിക്കുന്നതായിരുന്നു, സ്വർഗ്ഗവും അതിനോടു പ്രതികരിച്ചു. ആകാശം തുറന്നിരിക്കുന്നതും ആത്മാവ് ഒരു പ്രാവിനെപ്പോലെ അവന്റെ മേൽ ഇറങ്ങുന്നതും അവൻ കണ്ടു. യേശു ക്രിസ്തുവോ/മിശിഹായോ ആയിരുന്നു എന്ന ആത്മാവിന്റെ സാക്ഷ്യമാണിത്.

“മിശിഹാ” അല്ലെങ്കിൽ “ക്രിസ്തു” എന്ന വാക്കിന്റെ അർത്ഥം “അഭിഷിക്തൻ” എന്നാണ്. പഴയനിയമത്തിൽ അഭിഷേകം ചെയ്യപ്പെട്ട മൂന്നുതരം ആളുകൾ മാത്രമേ ഉണ്ടായിരുന്നുള്ളൂ: പ്രവാചകന്മാർ, പുരോഹിതന്മാർ, രാജാക്കന്മാർ. പരിശുദ്ധാത്മാവിന്റെ പ്രതീകമായ എണ്ണകൊണ്ട് അവരെ അഭിഷേകം ചെയ്തു. പഴയനിയമ പ്രവചനം പുരോഗമിക്കുമ്പോൾ, പ്രവാചകൻ, പുരോഹിതൻ, രാജാവ് എന്നീ നിലകളിൽ മശിഹാ വരുമെന്നും പരിശുദ്ധാത്മാവിനാൽ തന്റെ ദൗത്യത്തിനായി അഭിഷേകം ചെയ്യപ്പെടുമെന്നും വ്യക്തമാകുന്നു.

അതിനാൽ ക്രിസ്തുവിന്റെ സ്നാനത്തിൽ പരിശുദ്ധാത്മാവിനാൽ മിശിഹാ ആയി അഭിഷേകം ചെയ്യുന്നതിനു പ്രാവിന്റെ രൂപത്തിൽ സ്വർഗ്ഗത്തിൽ നിന്ന് ഇറങ്ങിവരുന്നു. പരിശുദ്ധാത്മാവ് ഒരു പ്രാവിന്റെ രൂപം സ്വീകരിച്ചത് എന്തുകൊണ്ടാണെന്ന് പറയാൻ കഴിയില്ല. പ്രാവ് ഇന്ന് പരിശുദ്ധാത്മാവിന്റെ ഒരു പൊതു ചിഹ്നമാണ്. സൃഷ്ടിയിൽ “ദൈവത്തിന്റെ ആത്മാവു വെള്ളത്തിൻ മീതെ പരിവർത്തിച്ചുകൊണ്ടിരുന്നു” എന്ന് ഉല്പത്തി 1: 2 ന്റെ പ്രതിധ്വനികൾ ചിലർ ഇവിടെ കാണുന്നു. എന്തായാലും, ഇവിടെ പ്രധാന കാര്യം പരിശുദ്ധാത്മാവ് യേശുവിന്റെ സ്നാനത്തിൽ സാക്ഷ്യം വഹിച്ചു എന്നതാണ് - അവനെ ക്രിസ്തുവായി തിരിച്ചറിഞ്ഞ് അവന്റെ ദൗത്യത്തിനായി അഭിഷേകം ചെയ്തു.

C. പിതാവിന്റെ സാക്ഷ്യം - യേശു ദൈവപുത്രനാണ്

ആകാശം കീറി പിതാവിന്റെ സാക്ഷ്യത്തിനുള്ള വഴിയും തുറക്കുന്നു. 11-ാം വാക്യം നോക്കൂ: “11 നീ എന്റെ പ്രിയപുത്രൻ; നിന്നിൽ ഞാൻ പ്രസാദിച്ചിരിക്കുന്നു എന്നു സ്വർഗ്ഗത്തിൽ നിന്നു ഒരു ശബ്ദവും ഉണ്ടായി’” (മർക്കോസ് 1:11). ആത്മാവിന്റെ സാക്ഷ്യം ഒരു പ്രാവിന്റെ ശാരീരിക രൂപത്തിൽ ദൃശ്യമായി. എന്നാൽ പിതാവിന്റെ സാക്ഷ്യം ശബ്ദമായി മുഴങ്ങിക്കേട്ടു. കിസ്തുവല്ലാതെ, ഈ ശബ്ദം കേട്ടിട്ടുണ്ടോ എന്ന് ഇവിടെ നമ്മോട് പറയുന്നില്ല, എന്നിരുന്നാലും യേശുവിന്റെ ചില ശിഷ്യന്മാർ സമാനമായ സ്വരം മറുരൂപമലയിൽ വെച്ച് ക്രിസ്തു ശിഷ്യന്മാരുടെ മുൻപാകെ രൂപാന്തരപ്പെട്ടപ്പോൾ അവർ കേട്ടതായി മർക്കോസ് 9: 7 ൽ നാം വായിക്കുന്നു.

യേശുവിനെക്കുറിച്ചുള്ള പിതാവിന്റെ സാക്ഷ്യം ഹ്രസ്വമാണ്, എന്നാൽ പഴയനിയമത്തിലെ പ്രതിധ്വനികൾ നിറഞ്ഞതാണ്. സങ്കീർത്തനം 2 ന്റെ പ്രതിധ്വനി അതിൽ അടങ്ങിയിരിക്കുന്നു, അത് മിശിഹായെ പ്രവചനാത്മകമായി ചൂണ്ടിക്കാണിക്കുന്നു, പ്രത്യേകിച്ചും 7-ാം വാക്യത്തിൽ, “നീ എന്റെ പുത്രൻ; ഇന്നു ഞാൻ നിന്നെ ജനിപ്പിച്ചിരിക്കുന്നു.”

ഇത് യേശുവിനെ യെശയ്യാവിന്റെ "ദാസൻ" ഭാഗങ്ങളുമായി ബന്ധിപ്പിക്കുന്നു, പ്രത്യേകിച്ചും യെശയ്യാവു 42 ക്രിസ്തുവിന്റെ മേൽ ഇറങ്ങിവരുന്ന ആത്മാവിന്റെ വെളിച്ചത്തിലും സമാനമായ ഭാഷയിലും: “ഇതാ, ഞാൻ താങ്ങുന്ന എന്റെ ദാസൻ; എന്റെ ഉള്ളം പ്രസാദിക്കുന്ന എന്റെ വൃതൻ; ഞാൻ എന്റെ ആത്മാവിനെ അവന്റെ മേൽ വെച്ചിരിക്കുന്നു; അവൻ ജാതികളോടു ന്യായം പ്രസ്താവിക്കും. ” (യെശയ്യാവു 42: 1)

മറ്റൊരു വാക്യം ഉല്പത്തി 22:2 ആണ്. അബ്രാഹമിന്റെ മകനായ യിസഹാക്കിനെ മോറിയ മലയിൽ യാഗം കഴിയ്ക്കുവാൻ യാഹ്വേ ആവശ്യപ്പെട്ടപ്പോൾ, അതു ദൈവപുത്രനായ യേശുവിന്റെ ഒരു നിഴലായിട്ടായിരുന്നു അത് സംഭവിച്ചത്. “2 അപ്പോൾ അവൻ: നിന്റെ മകനെ, നീ സ്നേഹിക്കുന്ന നിന്റെ ഏകജാതനായ യിസ്ഹാക്കിനെ തന്നേ കൂട്ടിക്കൊണ്ടു മോരിയാദേശത്തു ചെന്നു, അവിടെ ഞാൻ നിന്നോടു കല്പിക്കുന്ന ഒരു മലയിൽ അവനെ ഹോമയാഗം കഴിക്ക എന്നു അരുളിച്ചെയ്തു.” (ഉല്പത്തി 22: 2) പിതാവായ ദൈവത്തിൽ നിന്നുള്ള വ്യക്തമായ സാക്ഷ്യമാണ് യേശുവിന്റെ ഈ ഏകീഭവിക്കൽ.

മാത്രമല്ല, പുത്രനിൽ പ്രസാദമുണ്ടെന്ന് പിതാവ് സാക്ഷ്യപ്പെടുത്തുന്നു. എന്തുകൊണ്ട്? കാരണം, ഇപ്പോൾ യോഹന്നാന്റെ സ്നാനത്തിന് വഴങ്ങിക്കൊണ്ട്, ഭാവിയിൽ യേശു തന്നെത്തന്നെ ക്രൂശിൽ ഏൽപ്പിക്കുന്നു. സ്നാനം എന്താണ് പ്രതിനിധാനം ചെയ്യുന്നതെന്നും ക്രൂശിലെ സ്വന്തം മരണം എന്താണെന്നും യേശുവിന് അറിയാമായിരുന്നു. നമ്മുടെ പാപങ്ങൾക്കായി ക്രൂശിൽ മരിക്കാൻ ദൈവം തന്റെ ഏകപുത്രനെ ലോകത്തിലേക്ക് അയച്ചു; പുത്രൻ പിതാവിനെ അനുസരിച്ചു, മനസ്സോടെ വന്നു. പിതാവിനോടുള്ള അനുസരണത്തിൽ നിന്നാണ് യേശു സ്നാനമേറ്റത്; യേശുവിന്റെ സ്നാനത്തിൽ പിതാവ് തന്റെ പുത്രനിൽ പ്രസാദം പ്രകടിപ്പിക്കുന്നു.

അതിനാൽ ദൈവത്തിന്റെ മൂന്നു അംഗങ്ങളും യേശുവിനെ രക്ഷകനായും ക്രിസ്തുവായും ദൈവപുത്രനായും സാക്ഷ്യം വഹിക്കുന്നു. 1-ാം വാക്യത്തിൽ മർക്കോസ് തന്റെ സുവിശേഷം ആരംഭിച്ചു: “ദൈവപുത്രനായ യേശുക്രിസ്തുവിനെക്കുറിച്ചുള്ള സുവിശേഷത്തിന്റെ ആരംഭം.” (മർക്കോസ് 1: 1) യേശു എന്ന പേരിന്റെ അർത്ഥം “രക്ഷകൻ” എന്നാണെന്നോർക്കുമ്പോൾ, ക്രിസ്തുവിനായുള്ള ഈ മൂന്ന് പദവികളും യേശുവിന്റെ സ്നാനത്തിൽ ദൈവത്താൽ സ്ഥിരീകരിക്കപ്പെട്ടിട്ടുണ്ട്. അവൻ തീർച്ചയായും രക്ഷകനാണ്, “ദൈവപുത്രനായ യേശുക്രിസ്തു.”