യേശു യാതൊരു വളച്ചുകെട്ടുമില്ലാതെ, യാതൊരു ഉപമയും കൂടാതെ, വളരെ പ്ലെയിനായിട്ടാണ്, തന്റെ മരണത്തെ ക്കുറിച്ചുപറഞ്ഞതെങ്കിലും യേശു മരിക്കുമെന്ന് വിശ്വസിക്കാൻ ശിഷ്യന്മാർക്ക് കഴിഞ്ഞിരുന്നില്ല. ഇപ്പോൾ അവർ അവങ്കൽ ഇടറും. അവർ അവനെ തള്ളിപ്പറയും, അവർ അവനെവിട്ട് ഓടിപ്പോകും. അങ്ങനെ അവർ അവനോടു അവിശ്വസ്തത കാണിക്കും. അവരുടെ വിശ്വാസവുമായി പൊരുത്തപ്പെടാത്ത കാര്യം അവർ ചെയ്യും. അവർ തങ്ങളുടെ വിശ്വാസത്തെ ത്യജിക്കയില്ലെങ്കിലും, ഭയത്താൽ അവർ യേശുവിനെ വിട്ട് ഓടിപ്പോകും. അതു ഇന്നു രാത്രി തന്നെ സംഭവിക്കും എന്ന് യേശു ഒരു പ്രവചനം പോലെ, ഒരു മുന്നറിയിപ്പെന്ന പോലെ അവരോടു പറയുന്നു.

സെഖര്യാ പ്രവചനം 13: 7-ന്റെ നിവൃത്തിയായി ഇത് സംഭവിക്കുമെന്ന് യേശു പറയുന്നു. ദൈവവചനം ഗ്രഹിക്കണമെങ്കിൽ ദൈവംതന്നെ നമ്മുടെ ഹൃദയത്തെ മൂടിയിരിക്കുന്ന മൂടുപടം നീക്കം ചെയ്യേണം. എങ്കിലെ ദൈവവചനം നമുക്കു ഗ്രഹിക്കുവാൻ കഴിയു. യേശു മനുഷ്യരുടെ കയ്യാൽ മരിക്കും; അവന്റെ കൊലപാതകത്തിന് മനുഷ്യർ ഉത്തരവാദികളായിരിക്കും. അതേസമയം പിതാവാണ് സ്വന്തം പുത്രനെ അടിക്കുന്നത് എന്ന് യെശയ്യാ പ്രവചനവും പറയുന്നു. യെശയ്യാവു 53:6 ൽ നാം ഇപ്രകാരം വായിക്കുന്നു: "എന്നാൽ യഹോവ നമ്മുടെ എല്ലാവരുടെയും അകൃത്യം അവന്റെ മേൽ ചുമത്തി". "അവനെ തകർത്തുകളവാൻ യഹോവക്കു പ്രസാദം തോന്നി" (53:10). “സ്വന്തപുത്രനെ ആദരിക്കാതെ നമുക്കു വേണ്ടി ഏൽപ്പിച്ചുതന്നു” എന്നും റോമർ 8:32 ലും നാം വായിക്കുന്നു. അതായത്, ദൈവത്തിന്റെ പദ്ധതിയും മനുഷ്യന്റെ തിന്മയും സമന്വയിച്ച്, ദൈവത്തിന്റെ ആത്യന്തിക പദ്ധതി ദൈവം നിവൃത്തിപ്പാൻ പോകുന്നു.

ഇടയനായ യേശുവിനെ കൊല്ലേണ്ടതിനായി അവനെ വെട്ടും. അപ്പോൾ ആടുകൾ എല്ലാം ചിതറിപ്പോകും. എന്നാൽ അവരുടെ ചിതറിപ്പോക്ക് അധികസമയം നീണ്ടു നിൽക്കുകയില്ല. താൻ പുനരുത്ഥാനം ചെയ്തതിനു ശേഷം, അവർ അവനെ എവിടെയാണ് കണ്ടുമുട്ടേണ്ടതെന്ന് യേശു പ്രത്യേക നിർദ്ദേശം നൽകുകയാണ്. അവർക്കു താൻ പ്രത്യാശ നൽകുകയാണ്. “ഞാൻ ഉയിർത്തെഴുന്നേറ്റശേഷം നിങ്ങൾക്കു മുമ്പായി ഗലീലിയിലേക്കു പോകും.”

ഇതൊക്കേയും യേശുവിന്റെ സർവജ്ഞാനത്തിന്റേയും ദൈവത്വത്തിന്റേയും വലിയ പ്രദർശനമാണ്. എന്നാൽ താനിതു പറയുമ്പോൾ ശിഷ്യന്മാരുടെ അതിനോടുള്ള പ്രതികരണം കൂടി വിലയിരുത്തുന്നത് ഉചിതമായിരിക്കുമെന്ന് ഞാൻ കരുതുന്നു. ആദ്യം പത്രൊസ് പറയുന്നതു നോക്കാം: 33 "അതിന്നു പത്രൊസ്; എല്ലാവരും നിങ്കൽ ഇടറിയാലും ഞാൻ ഒരുനാളും ഇടറുകയില്ല എന്നു ഉത്തരം പറഞ്ഞു."

യേശുവിനെ തന്റെ വചനപ്രകാരം സ്വീകരിക്കാനും അവനോടു തർക്കിക്കാതിരിക്കാനും പത്രോസ് ഇപ്പോഴെങ്കിലും പഠിച്ചിരുന്നുവെങ്കിൽ എന്നു തോന്നിപ്പിക്കുന്ന ഒരു അവസരമായി ഇതിരിക്കുന്നു. പത്രോസിനു കർത്താവിന്റെ വാക്കുകളെ മുഖവിലക്കെടുത്തു വിശ്വസിപ്പാൻ കഴിഞ്ഞില്ല എന്നു മാത്രമല്ല ഒരു വെല്ലുവിളി പോലെയുള്ളതായിരുന്നു പത്രോസിന്റെ മറുപടി. താൻ പറഞ്ഞതിന്റെ അർത്ഥം ഈ ഇരിക്കുന്ന 10 പേരും നിങ്കൽ ഇടറിയാലും ഈ ഞാൻ നിന്നിൽ ഒരുനാളും ഇടറുകില്ല" എന്നാണ്.

പത്രോസിന്റെ വാക്കുകളും വ്യാകരണ ശൈലിയും തന്റെ അവിശ്വാസത്തിന്റേയും തലക്കനത്തിന്റേയും മറ്റ് ശിഷ്യന്മാരോടുള്ള പുച്ഛത്തിന്റേയും ചുവയുള്ളതായിരുന്നു.

എന്നാൽ കർത്താവ് ഇപ്പോൾ പത്രോസിനെ ഒരു പ്രധാന പാഠം പഠിപ്പിക്കുകയാണ്. സർവജ്ഞനിയായ ഒരാളോട് തർക്കിക്കുന്നത് ബുദ്ധിയല്ല എന്ന പാഠമാണ് കർത്താവ് ഇതിലൂടെ പത്രോസിനെ പഠിപ്പിക്കുന്നത്. നിന്റെ വീരവാദം, ആത്മപ്രശംസ വെറുതെയാകുമെന്ന് യേശു പത്രോസിനോട് പറയുന്നു.

34-ാ‍ം വാക്യം: യേശു പത്രോസിനു നൽകുന്ന മറുപടിയാണ്: നീ ഒരുനാളും ഇടറുകില്ല എന്നല്ലേ പറഞ്ഞത് എന്നാൽ കേട്ടുകൊള്ളു, “ഈ രാത്രിയിൽ കോഴി കൂകുംമുമ്പെ നീ മൂന്നുവട്ടം എന്നെ തള്ളിപ്പറയും എന്നു ഞാൻ സത്യമായിട്ടു നിന്നോടു പറയുന്നു” എന്നു പറഞ്ഞു." ഞാൻ സത്യമായിട്ട്, അല്ലെങ്കിൽ അടിവരയിട്ട്, അതല്ലെങ്കിൽ ഏറ്റവും ഉറപ്പായിട്ട്, നിന്നോടു പറയുന്നു: “ഈ രാത്രിയിൽ കോഴി കൂകുംമുമ്പെ നീ മൂന്നുവട്ടം എന്നെ തള്ളിപ്പറയും." പത്രോസ് തന്നെ തള്ളിപ്പറയുമെന്ന് മാത്രമല്ല, മൂന്നു വട്ടം താനതു ആവർത്തിക്കും. ഇനിയും അത് എപ്പോൾ സംഭവിക്കുമെന്നും യേശു വ്യക്തമായി പറയുന്നു.

സാധാരണഗതിയിൽ കോഴി കൂവുന്ന സമയമെന്ന് പറയുന്നത് പുലർച്ചെ 3 നും 4 നും ഇടയ്ക്കാണ്. നാളെ സൂര്യനുദിക്കുന്നതിനുമുൻപ് നീയിതു ചെയ്തിരിക്കും. ഇതു യേശുവിന്റെ ദൈവത്വത്തിന്റെ എത്രയൊ വലിയ തെളിവാണ്. വചനം ഇത്രയൊക്കെ വ്യക്തമായി യേശുവിന്റെ ദൈവത്വത്തെക്കുറിച്ചു വെളിപ്പെടുത്തിയിട്ടും യേശുക്രിസ്തുവിന്റെ ദൈവത്വത്തെ നിഷേധിക്കുന്ന അനേകർ ഇന്ന് ലോകത്തുണ്ട് എന്നത് എത്രയൊ സങ്കടകരമാണ്!