"3 എന്റെ ദൈവമായ യഹോവേ, ഞാൻ ഇതു ചെയ്തിട്ടുണ്ടെങ്കിൽ, എന്റെ പക്കൽ നീതികേടുണ്ടെങ്കിൽ, 4 എനിക്കു ബന്ധുവായിരുന്നവനോടു ഞാൻ ദോഷം ചെയ്തിട്ടുണ്ടെങ്കിൽ, - ഹേതുകൂടാതെ എനിക്കു വൈരിയായിരുന്നവനെ ഞാൻ വിടുവിച്ചുവല്ലോ - 5 ശത്രു എന്റെ പ്രാണനെ പിന്തുടർന്നു പിടിക്കട്ടെ; അവൻ എന്റെ ജീവനെ നിലത്തിട്ടു ചവിട്ടട്ടെ; എന്റെ മാനത്തെ പൂഴിയിൽ തള്ളിയിടട്ടെ. സേലാ."

നീതിമാൻ തന്റെ നിരപരാധിത്വത്തെ പ്രതിരോധിക്കുന്നതാണ് ഈ വാക്യങ്ങളിൽ. ന്യായീകരണത്തിനായുള്ള തന്റെ അഭ്യർത്ഥനയെ നിയമാനുസൃതമാക്കുന്നതിന്, തന്റെ കൈകളിൽ അനീതിയില്ലെന്ന് സങ്കീർത്തനക്കാരൻ സ്ഥിരീകരിക്കുന്നു. തന്റെ പക്കൽ അനീതിയുണ്ടെങ്കിൽ, ന്യായീകരണത്തിനായുള്ള അപേക്ഷ കപടമായിരിക്കും. ശപഥങ്ങളിൽ ഉപയോഗിക്കുന്ന പദപ്രയോഗങ്ങളിലാണ് ഈ വാക്യങ്ങൾ രൂപപ്പെടുത്തിയിരിക്കുന്നത്: “ഞാൻ ഇത് ചെയ്തിട്ടുണ്ടെങ്കിൽ, എന്റെ കൈകളിൽ അകൃത്യം ഉണ്ടെങ്കിൽ, എന്നോട് സമാധാനത്തിലായിരുന്നവന് ഞാൻ തിന്മ ചെയ്തിട്ടുണ്ടെങ്കിൽ. . . ശത്രു എന്നെ പിന്തുടർന്ന് എന്നെ പിടിക്കട്ടെ.” ഇതാണ് ആ ശപഥത്തിന്റെ ധ്വനിയെന്നത്. ഈ വരികൾ അദ്ദേഹത്തിന്റെ നിരപരാധിത്വത്തെ സംബന്ധിച്ച ഗൗരവമേറിയ ഒരു പ്രസ്താവനയാണ്. ഇവിടെ ദാവീദ് കൂശ് ആരോപിച്ചതുപോലെ ശൗലിനെ കൊല്ലുവാനുള്ള യാതൊരു ആലോചനയൊ ശ്രമമൊ നടത്തിയിട്ടില്ല. ഒരു തെറ്റായ ആരോപണത്തിന്റെ പേരിലാണ് ദാവിദ് ശൗലിന്റെ കയ്യാൽ വേട്ടയാടപ്പെട്ടുകൊണ്ടിരിക്കുന്നത്. അതുകൊണ്ട് ദാവീദ് ഈ കാര്യങ്ങൾ താൻ ചെയ്തിട്ടില്ലെന്നും അതിൽ തന്റെ ജീവൻ പണയപ്പെടുത്താൻ തയ്യാറാണെന്നും അദ്ദേഹം പറയുന്നു.

അദ്ദേഹം നിഷേധിക്കുന്ന ആരോപണം 4-ാം വാക്യത്തിൽ വ്യക്തമാക്കിയിട്ടുണ്ട് :4 എനിക്കു ബന്ധുവായിരുന്നവനോടു ഞാൻ ദോഷം ചെയ്തിട്ടുണ്ടെങ്കിൽ. തന്റെ ബന്ധുവായിരുന്ന ശൗലിനെ താൻ ഒരു നിലയിലും ദ്രോഹിച്ചിട്ടില്ല. അദ്ദേഹവുമായി സമാധാനത്തിലായിരുന്ന താൻ "തിന്മ ചെയ്തു" എന്നതാണ് ആ അപവാദ ആരോപണം (വാക്യം 4). ആ ആരോപണത്തെ താൻ നിഷേധിക്കുന്നുവെന്നു മാത്രമല്ല, വിപരീതമായ ഒരു പോയിന്റ് ഉപയോഗിച്ച് അദ്ദേഹം ആ ശപഥത്തിന്റെ ഒഴുക്കിനെ തടസ്സപ്പെടുത്തുന്നു. "5 ശത്രു എന്റെ പ്രാണനെ പിന്തുടർന്നു പിടിക്കട്ടെ; അവൻ എന്റെ ജീവനെ നിലത്തിട്ടു ചവിട്ടട്ടെ; എന്റെ മാനത്തെ പൂഴിയിൽ തള്ളിയിടട്ടെ." വാസ്തവത്തിൽ, ശത്രുവിന്റെ ആരോപണം കള്ളമാണ്. "ഞാൻ തെറ്റുചെയ്തിട്ടുണ്ടെങ്കിൽ" ഞാനതിനു ശിക്ഷ അനുഭവിപ്പാൻ തയ്യാറാണ്. ഞാൻ കുറ്റവാളിയാണെങ്കിൽ ശത്രുവിന്റെ കൈ എന്നെ പിന്തുടർന്നു പിടിക്കട്ടെ; അവനെന്ന ചവിട്ടിമെതിച്ചുകൊള്ളട്ടെ. അതിൽ നിന്നും ഒരു കാര്യം വ്യക്തം, താൻ ഇക്കാര്യത്തിൽ തികച്ചും നിരപരാധിയാണ്.

തന്നെ പരാമർശിക്കുമ്പോൾ, അവൻ "എന്റെ മാനത്തെ പൂഴിയിൽ തള്ളിയിടട്ടെ" എന്നുകൂടി പറയുന്നു. And lay my glory in the dust" എന്നാണ് ഇംഗ്ലീഷിൽ; അതായത് എന്റെ മഹത്വത്തെ പൂഴിയിൽ തള്ളിയിടട്ടെ." അത് അർത്ഥമാക്കുന്നത്, തന്റെ ജീവൻ മാത്രമല്ല, അവന്റെ ആന്തരിക മൂല്യവും നശിച്ചു പൊയ്ക്കൊള്ളട്ടെ എന്നാണ് താൻ പറയുന്നത്. തനിക്കു ഒരു അപമാനകരമായ മരണം പോലും നേരിട്ടുകൊള്ളട്ടെ. തനിക്കതിൽ യാതൊരു പരാതിയുമില്ല. ഇവിടെ "പൊടി" എന്നത് ശവക്കുഴിയെ സൂചിപ്പിക്കുന്നു. അതായത്, തന്നെ കൊന്നുകൊള്ളട്ടെ. ഞാൻ ശവക്കുഴിയിൽ പോകാൻ തയ്യാറാണെന്നാണ് സാരം. കേവലം മരണമല്ല; അപമാനകരമായ മരണം പോലും സ്വീകരിക്കുവാൻ താൻ തയ്യാറാണ്. തന്റെ നിരപരാധിത്വത്തെക്കുറിച്ച് അപേക്ഷകൻ വളരെ ഉറപ്പുള്ളതിനാൽ, കുറ്റക്കാരനാണെങ്കിൽ അവന്റെ ശത്രുക്കൾ അവനെ കൊന്നുകൊള്ളട്ടെ എന്നാണ് അദ്ദേഹം സത്യം ചെയ്യുന്നത്. എന്നാൽ ഇത് പറയുമ്പോൾ താൻ നിരപരാധിയാണെന്ന് അവന് വ്യക്തമായി അറിയാം, ശത്രു തന്റെ മേൽ വിജയിക്കുന്നത് കാണാൻ സങ്കീർത്തനക്കാരൻ ഉദ്ദേശിക്കുന്നില്ല. തന്റെ നിരപരാധിത്വത്തിന്റെ വെളിച്ചത്തിൽ തന്നെ വിധിക്കണമെന്നാണ് ദാവിദ് ധൈര്യത്തോടെ അപേക്ഷിക്കുന്നത്.

പ്രായോഗികത: നാം തെറ്റായി ആരോപണവിധേയരാകുമ്പോൾ, നിങ്ങൾ അവരോട് ശത്രുത പുലർത്താതിരിക്കുക. നിങ്ങൾതന്നെ അതിനു പ്രതികാരം ചെയ്യണം എന്ന് തീരുമാനിക്കാതിരിക്കുക. നിങ്ങളുടെ മനസ്സാക്ഷി ശുദ്ധമാണെന്നും നിങ്ങളുടെ കൈകൾ പ്രതികാരം ചെയ്യാൻ ആഗ്രഹിക്കുന്നില്ലെന്നും ഉറപ്പു വരുത്തുക. അങ്ങനെയാകുമ്പോൾ ദൈവികനീതിക്കായി ആത്മവിശ്വാസ ത്തോടെ ദൈവത്തോടു പ്രാർത്ഥിക്കാൻ കഴിയും.

രണ്ടാമത്തെ പോയിന്റിന്റെ ഒരു സബ്-പോയിന്റായി ഞാൻ പറയുവാൻ ആഗ്രഹിക്കുന്നത്, നീതിമാന് ന്യായീകരണത്തിനായി അപേക്ഷിക്കാം

A. നീതിമാന് ന്യായീകരണത്തിനായി അപേക്ഷിക്കാം (6—9).

"6 യഹോവേ, കോപത്തോടെ എഴുന്നേൽക്കേണമേ; എന്റെ വൈരികളുടെ ക്രോധത്തോടു എതിർത്തുനിൽക്കേണമേ; എനിക്കു വേണ്ടി ഉണരേണമേ; നീ ന്യായവിധി കല്പിച്ചുവല്ലോ. 7 ജാതികളുടെ സംഘം നിന്നെ ചുറ്റിനിൽക്കട്ടെ; നീ അവർക്കു മീതെ കൂടി ഉയരത്തിലേക്കു മടങ്ങേണമേ. 8 യഹോവ ജാതികളെ ന്യായംവിധിക്കുന്നു; യഹോവേ, എന്റെ നീതിക്കും പരമാർത്ഥതെക്കും തക്കവണ്ണം എന്നെ വിധിക്കേണമേ; 9 ദുഷ്ടന്റെ ദുഷ്ടത തീർന്നുപോകട്ടെ; നീതിമാനെ നീ ഉറപ്പിക്കേണമേ. നീതിമാനായ ദൈവം ഹൃദയങ്ങളെയും അന്തരിന്ദ്രിയങ്ങളെയും ശോധനചെയ്യുന്നുവല്ലോ."

6-ാം വാക്യത്തിൽ, ദാവീദ് തന്റെ സഹായത്തിനായി യഹോവയോട് അപേക്ഷിക്കുന്നു. ആരോപണങ്ങളിൽ അവൻ നിരപരാധിയായതിനാൽ, സങ്കീർത്തനക്കാരന് ദൈവിക ന്യായീകരണത്തിനായി അപേക്ഷിക്കാൻ സ്വാതന്ത്ര്യമുണ്ട്, അവൻ ധീരമായ നിർബന്ധങ്ങൾ ഉപയോഗിക്കുന്നു: “എഴുന്നേൽക്കുക, "ഉണരുക” എന്നിത്യാദി ഈ മാനുഷികമായ അപേക്ഷകൾ (ആന്ത്രോപോമോർഫിസങ്ങൾ) ദൈവത്തെ അവനുവേണ്ടി വേഗത്തിൽ പ്രവർത്തിക്കാൻ പ്രേരിപ്പിക്കുന്നതിനാണ്. ഈ ശത്രുക്കളുടെ കോപത്തിനെതിരെ ദൈവം തന്റെ കോപത്തിൽ എഴുന്നേൽക്കണം. വാക്യത്തിലെ “ഉണരുക” എന്ന പ്രയോഗം ഇതുവരെ ദൈവം അവന്റെ പ്രാർത്ഥന ശ്രദ്ധിക്കാതെ ഇരുന്നു എന്ന സൂചനയാണ് നൽകുന്നത്. ഇപ്പോൾ ദൈവം അവസരത്തിനൊത്ത് എഴുന്നേറ്റ് നീതി നടപ്പാക്കണമെന്നതാണ് അഭ്യർത്ഥന. ഈ നീതിയിൽ ശത്രുവിന്റെ മേലുള്ള വിധി ഉൾപ്പെടും, അത് പൊതുവായ വിധിയായിരിക്കാം, അതല്ലെങ്കിൽ ഒരു പ്രത്യേക വിധിയായിരിക്കാം. അതായത്, അന്ത്യനാളിൽ നരകത്തിലേക്ക് തള്ളിക്കളയുന്ന വിധി ആയിരിക്കാം. അതല്ലെങ്കിൽ ഇപ്പോൾ അവനെ ഏതെങ്കിലും നിലയിൽ പരാജയപ്പെടുത്തുകയൊ നീക്കിക്കളയുകയൊ ചെയ്യുന്നതായിരിക്കാം. എന്തു തന്നെ ആയാലും ദൈവമെ വേഗം അവിടുന്ന് എഴുന്നേറ്റ് തന്റെ വിധി നടപ്പാക്കേണമെ എന്നാണ്~ താൻ അപേക്ഷിക്കുന്നത്.

അടുത്തവാക്യത്തിൽ "നീ ന്യായവിധി കല്പിച്ചുവല്ലൊ" എന്ന് നാം വായിക്കുന്നു. അതായത്, “നീ കല്പിച്ച നീതിയെ എനിക്കു വേണ്ടി ഉണർത്തുക.” ദൈവം ദൈവം ശത്രുവിനുവേണ്ടി വിധിച്ച വിധി നടപ്പാക്കേണമെ. അങ്ങനെ അവന്റെ ദുഷ്ടതക്ക് ഒരു അറുതി വരുത്തണം. മറ്റൊരു ആവശ്യം താൻ ഉന്നയിക്കുന്നത്, ഒത്തുകൂടിയ എല്ലാ ജനങ്ങളും അതിന് സാക്ഷ്യം വഹിക്കാൻ തക്കവിധം അവിടുന്നു ഈ വിധി നടപ്പാക്കണം എന്നതാണ് (വാക്യം 7). മറ്റു ജനങ്ങൾ മുമ്പാകെ ആരോപിതനെ കുറ്റവിമുക്തനാക്കി, യഥാർത്ഥ കുറ്റവാളിയെ അഥവാ ദുഷ്ടനെ ന്യായം വിധിക്കേണമെ എന്നാണ് താൻ ആവശ്യപ്പെടുന്നത്.

വടക്കെയിന്ത്യയിൽ ക്രിസ്ത്യാനികൾ പീഡിപ്പിക്കപ്പെടുമ്പോൾ ഞാനും ഈ നിലയിൽ ഒക്കെ പ്രാർത്ഥിക്കാറുണ്ട്. ദൈവമെ അവിടെ ഭരിക്കുന്ന ഗവന്മെന്റുകളെ ന്യായം വിധിച്ച്, വിശ്വാസികളുടെ നിരപരാധിത്വത്തെ ജനങ്ങൾക്ക് മുൻപാകെ സാക്ഷിക്കുവാൻ ഇടയാക്കേണമെയെന്ന്.

ഇവിടെ സങ്കീർത്തനക്കാരൻ വ്യക്തമായ, മനഃപൂർവ്വമായ ഒരു ന്യായീകരണം ആഗ്രഹിക്കുന്നു. "നീ അവർക്കു മീതെ കൂടി ഉയരത്തിലേക്കു മടങ്ങേണമെ." ദൈവം ഭൂമിയിലേക്ക് വരികയും സാക്ഷികളെ കേൾക്കുകയും ശത്രുക്കളുടെ മേൽ തന്റെ ന്യായവിധി നടത്തി സിംഹാസനത്തിലേക്ക് മടങ്ങുകയും ചെയ്യേണമെ എന്ന് അത് മനസ്സിലാക്കാം. പ്രാർത്ഥനാ സമയത്ത് ദൈവിക നീതി പ്രാവർത്തികമാക്കിയിട്ടില്ല, അതുകൊണ്ട് ദൈവം വേഗം നീതി പ്രവർത്തിച്ച് ശത്രുവിന്റെ മേൽ നീതി നടപ്പാക്കേണമെ എന്നാണ് ഇവിടെ അർത്ഥമാക്കുന്നത്.

8-ാം വാക്യം യഹോവ ജാതികളെയും രാഷ്ട്രങ്ങളെയും ന്യായം വിധിക്കുന്നു എന്ന പ്രഖ്യാപനമാണ് നൽകുന്നത്. യഹോവ ജാതികളെയും രാഷ്ട്രങ്ങളെയും ന്യായം വിധിക്കുന്നു. യഹോവ ലോകമെമ്പാടും ഇത് ചെയ്യുന്നതിനാൽ, സങ്കീർത്തനക്കാരൻ ഇപ്പോൾ തന്നെ ന്യായം വിധിക്കണമെന്ന് അഭ്യർത്ഥിക്കുന്നു. അവന്റെ നീതിയും സത്യസന്ധതയും അനുസരിച്ചാണ് ന്യായീകരണം നടക്കേണ്ടത് എന്നതാണ് അവന്റെ അഭ്യർത്ഥന. മറ്റൊരു വിധത്തിൽ പറഞ്ഞാൽ, തനിക്കെതിരെ ഉന്നയിക്കപ്പെട്ട തെറ്റായ ആരോപണങ്ങൾക്കിടയിലും, താൻ നീതിയോടും സത്യസന്ധതയോടും കൂടി പ്രവർത്തിക്കുന്നുണ്ടെന്ന് വെളിപ്പെടുത്തുന്ന ഒരു തീരുമാനം ദൈവത്തിന്റെ ഭാഗത്തുനിന്നുണ്ടാകണം. നീതിമാനും സർവ്വജ്ഞനുമായ ന്യായാധിപൻ ദുഷ്ടന്മാരുടെ ദുഷ്ടത അവസാനിപ്പിച്ച് നീതിമാന്മാരെ സുരക്ഷിതരാക്കണം. നീതിമാന്മാരെ ന്യായികരിക്കണം. ഇതാണ് അദ്ദേഹം ആവശ്യപ്പെടുന്നത്. ഈ അപേക്ഷയുടെ അടിസ്ഥാനം ദൈവത്തെക്കുറിച്ചുള്ള ആഴത്തിലുള്ള അറിവാണ്: ദൈവം നീതിയോടെ ന്യായംവിധിക്കുന്ന ന്യായാധിപതിയാണ്. അവൻ “ഹൃദയങ്ങളെയും മനസ്സുകളെയും പരിശോധിക്കുന്ന നീതിമാനായ ദൈവമാണ്.” അതിനാൽ നീതിമാന്മാരായ ആളുകൾക്ക് ദൈവിക പരിശോധനയെ ഭയപ്പെടേണ്ടതില്ല.

പ്രായോഗികത: ദൈവം മനുഷ്യരുടെ ഹൃദയങ്ങളെയും മനസ്സുകളെയും പരിശോധിച്ചാണ് ന്യായവിധി നടത്തുന്നത്. മാത്രവുമല്ല, അവൻ പക്ഷം പിടിക്കാത്ത ന്യായാധിപനും കൂടിയാണ്. അതുകൊണ്ട് ശത്രുവിനെതിരെ ഗൂഡാലോചന നടത്താതെ നീതിയോടെ ന്യായം വിധിക്കുന്ന യാഹ്വേയുടെ കരങ്ങളിൽ കാര്യം ഭരമേൽപ്പിക്കുക എന്നതാണ് ഒരു വിശ്വാസി ചെയ്യേണ്ടത്.

മൂന്നാമത്തെ പോയിന്റായി ഈ സങ്കീർത്തനത്തിൽ നിന്നും ഞാൻ പറയാൻ ആഗ്രഹിക്കുന്നത്, ദൈവം ദുഷ്ടന്മാരെ എങ്ങനെ പരാജയപ്പെടുത്തുന്നു വെന്ന് നിരീക്ഷിക്കുന്നതിലൂടെ, നീതിമാന്മാർക്ക് ദൈവത്തിന്റെ നീതിയിലുള്ള വിശ്വാസം പുതുക്കാൻ സാധിക്കും എന്നകാര്യമാണ്.