സ്തുതി ഒരു സജീവ വിശ്വാസത്തിന്റെ തെളിവാണ്, കാരണം ആളുകൾ കർത്താവിനെ എത്ര നന്നായി അറിയുന്നുവെന്നും അവനോട് അവർ എത്രത്തോളം വിശ്വസ്തരാണെന്നും അത് വെളിപ്പെടുത്തുന്നു.

സാർവ്വത്രികമായ ആരാധനക്കുള്ള ആഹ്വാനമാണ് ഒന്നാം വാക്യം. “ഭൂമി മുഴുവനെയും” അഭിസംബോധന ചെയതുകൊണ്ടാണ് ആഹ്വാനം. അതായത് ഭൂമിയിൽ എല്ലായിടത്തുമുള്ള ആളുകൾ കർത്താവിനെ സ്തുതിക്കുകയും സന്തോഷത്തോടെ അവന്റെ സന്നിധിയിൽ പ്രവേശിക്കുകയും വേണം (1—2). എങ്ങനെയാണ് ദൈവത്തെ ആരാധിക്കേണ്ടത് എന്നും ഇവിടെ വ്യക്തമാക്കുന്നു. “സന്തോഷത്തോടെ കർത്താവിനെ സേവിപ്പിൻ; സംഗീതത്തോടെ അവന്റെ സന്നിധിയിൽ വരുവിൻ." "സേവിപ്പിൻ" എന്നത് മതപരമായ സന്ദർഭത്തിൽ ആരാധനയെ സൂചിപ്പിക്കുന്നു. വിശ്വാസികളെ സംബന്ധിച്ചിടത്തോളം ആരാധനയും മറ്റുജോലികളും ഒരുപോലെ ആരാധന ആയിരിക്കണം. അവയെ തമ്മിൽ വേർതിരിക്കേണ്ട ആവശ്യം ഒരു വിശ്വാസിക്കില്ല. കാരണം "തിന്നാലും കുടിച്ചാലും എന്തുചെയ്താലും ദൈവമഹത്വത്തിനായി ചെയ്വിൻ" എന്നാണല്ലൊ 1 കൊരിന്ത്യർ 10:31 ൽ പൗലോസ് പറയുന്നത്. "സേവിക്കുക" എന്നതിനു മറ്റൊരു അർത്ഥവുമുണ്ട്. അത് രാഷ്ട്രീയ അർത്ഥമാണ്. അതായത്, യാഹ്വേ ഭൂമിയുടെ മേൽ പരമാധികാരിയാകയാൽ ഒരു രാജാവ് എന്ന നിലയിൽ സേവിക്കപ്പെടണം. കർത്താവിന്റെ മഹത്വത്തോടും നന്മയോടും ഉള്ള ഹൃദയംഗമമായ പ്രതികരണമാണ് സന്തോഷത്തോടെയുള്ള സേവനം. സന്തോഷകരമായ സേവനത്തിൽ പ്രകടമാകുന്ന മനോഭാവം ദൈവത്തെ സ്രഷ്ടാവായും വീണ്ടെടുപ്പുകാരനായും രാജാവായും അംഗീകരിക്കുന്നു എന്നതാണ്. ഡെറിക് കിഡ്‌നർ എന്ന ദൈവദാസൻ പറയുന്നതുപോലെ, സ്തുതിയുടെ ഘോഷയാത്രയിലൂടെയോ, ആദരാഞ്ജലിയുടെ ആർപ്പുവിളിയിലൂടെയോ, ആരവങ്ങൾ മുഴക്കുന്നതിലൂടെയോ അവൻ മുഴുവൻ ഭൂമിയുടെയും പരമാധികാരിയായി അംഗീകരിക്കപ്പെടുന്നു.

ഇനി എവിടെയാണ് ആരാധിക്കേണ്ടത് എന്ന കാര്യവും ഈ വാക്യം നമ്മേ ഓർപ്പിക്കുന്നു. ദൈവത്തിന്റെ വിശുദ്ധമന്ദിരത്തിലാണ് യാഹ്വേയെ ആരാധിക്കേണ്ടത്. വിശുദ്ധമന്ദിരം യാഹ്വേയുടെ സാന്നിദ്ധ്യത്തെ കുറിക്കുന്നു. അവിടെയാണ് വിശ്വാസികൾ ആരാധനയിൽ അവന്റെ മുമ്പാകെ ഒത്തുകൂടുന്നത്. ആരാധനക്കായി പ്രവേശിക്കുന്നത് യഹോവയുടെ സന്നിധിയിലേക്കാണ്; അവന്റെ മുമ്പാകെ ആണ്. "സംഗീതത്തോടെ അവന്റെ സന്നിധിയിൽ വരുവിൻ" എന്ന പ്രസ്താവന ഈ പ്രവേശനം “ആഹ്ലാദത്തോടെ” ആയിരിക്കണം എന്ന് നമ്മേ ഓർമ്മിപ്പിക്കുന്നു. മ്ലാനവദനരായൊ, ദുഃഖത്തോടെയൊ ആയിരിക്കരുത്.

ഇനി ദൈവത്തെ ഈ നിലയിൽ സ്തുതിക്കാനുള്ള കാരണം എന്താണെന്ന് നോക്കാം. ദൈവമാണ് അവരെ സൃഷ്ടിച്ചതും പരിപാലിക്കുന്നതും എന്നതാണത് (3). "യഹോവ തന്നെ ദൈവം എന്ന് അറിവിൻ". “അറിയുക” എന്നാൽ “പഠിക്കുക” അല്ലെങ്കിൽ “ഉറപ്പുവരുത്തുക” എന്നൊക്കെ അർത്ഥമാക്കുന്നു. കർത്താവിനെക്കുറിച്ചുള്ള അറിവ് സ്തുതിക്ക് ഒരു മുൻവ്യവസ്ഥയാണ്. ഇവിടെ ആളുകൾ യഹോവയെക്കുറിച്ച് അറിയേണ്ട, അംഗീകരിക്കേണ്ട മൂന്ന് കാര്യങ്ങളുണ്ട്: 1) അവൻ ദൈവമാണെന്ന് അറിയണം, 2) അവൻ അവരെ സൃഷ്ടിച്ചതിനാൽ അവർ അവനോട് കണക്കു ബോധിപ്പിക്കേണ്ടതുണ്ട് എന്ന് അംഗീകരിക്കണം, 3) ഉടമ്പടിയിൽ അവർക്ക് ഒരു പ്രത്യേക സ്ഥാനമുണ്ടെന്ന് അറിയണം.

ഒന്നാമതായി, ആളുകൾ സ്തുതിയോടെ അവന്റെ മുമ്പാകെ വരണം, കാരണം അവൻ ദൈവമാണ്. അത് തന്നെ മതിയായ കാരണമാണ്. കർത്താവ് ദൈവമാണ് - മറ്റാരുമില്ല. ഒരുപക്ഷെ, ആളുകൾ യാഹ്വേയിൽ നിന്ന് സ്വതന്ത്രരാണെന്ന് കരുതിയേക്കാം, എന്നാൽ അങ്ങനെയല്ല. കാരണം അവൻ ദൈവമാണ്, എല്ലാം അവനുള്ളത്. അവർക്കുള്ളതെല്ലാം അവനിൽ നിന്നാണ് വന്നത്. ഇത് ആരാധകർക്ക് പ്രത്യേകിച്ചും പ്രസക്തമാണ്, കാരണം സങ്കീർത്തനത്തിൽ ഉടമ്പടിയെക്കുറിച്ച് നിരവധി പരാമർശങ്ങളുണ്ട്; അതിനാൽ, യാഹ്വെ ഉടമ്പടി ദൈവമാണ്, നമ്മുടെ ഉടമ്പടി ദൈവമാണ്.

സ്തുതിക്കാനുള്ള ആഹ്വാനത്തിലെ രണ്ടാമത്തെ കാരണം യാഹ്വെ ദൈവമാണെങ്കിൽ, അവൻ സ്രഷ്ടാവാണ് എന്നതാണ്. “അവൻ നമ്മെ സൃഷ്ടിച്ചു”. ഈ പദപ്രയോഗം പൊതുവെ ആളുകളുടെ സൃഷ്ടിയെയും കൂടുതൽ വ്യക്തമായി പറഞ്ഞാൽ, രാഷ്ട്രത്തിന്റെ സൃഷ്ടിയെയും ഉൾപ്പെടുത്താൻ പര്യാപ്തമാണ്.

ജനങ്ങൾ ഈ സത്യത്തിൽ ശ്രദ്ധ കേന്ദ്രീകരിക്കുകയാണെങ്കിൽ, അവർ അത്ഭുതവും സ്തുതിയും കൊണ്ട് നിറയും. എന്നാൽ അതിലും പ്രധാനമായി, അവർ അവന്റേതാണെന്നും അതിനാൽ അവരുടെ സ്രഷ്ടാവായ ദൈവത്തോട് കണക്കു ബോധിപ്പിക്കേണ്ടവരാണെന്നും അവർ മനസ്സിലാക്കും.

വിശ്വാസികൾ യാഹ്വെയെ സ്തുതിക്കേണ്ടതിന്റെ മൂന്നാമത്തെ കാരണം, അവർക്ക് അവനുമായി ഒരു പ്രത്യേക ഉടമ്പടി ബന്ധമുണ്ട് എന്നതാണ്: “നാം അവന്റെ ജനവും അവന്റെ മേച്ചിൽപ്പുറത്തെ ആടുകളുമാണ്.” വിശ്വാസത്താൽ യാഹ്വെയുമായി ഉടമ്പടിയിൽ പ്രവേശിച്ച ആളുകൾ “അവന്റെ ജനം” ആണ്; അതായത്, ദൈവത്തിന്റെ ജനം. അവരെ ഇവിടെ “അവന്റെ മേച്ചിൽപ്പുറത്തെ ആടുകൾ” എന്നും വിശേഷിപ്പിക്കുന്നു. അതു കാണിക്കുന്നത്, ദൈവമാണ് തന്റെ ജനത്തിന് പരിചരണവും സംരക്ഷണവും കരുതലും നൽകുന്നത്.

വിശ്വസ്തരായ ആളുകൾ യാഹ്വേ ദൈവമാണെന്നും അവൻ അവരെ സൃഷ്ടിച്ചുവെന്നും അവൻ അവരുടെ ഇടയനാണെന്നും പൂർണ്ണമായി അറിയുകയും അംഗീകരിക്കുകയും ചെയ്യുമ്പോൾ, അവരുടെ പ്രതികരണം സന്തോഷകരമായ സ്തുതിയായി പുറത്തുവരും.