സുവിശേഷം എന്നാൽ "നല്ലവാർത്ത" എന്നാണ്. മനുഷ്യരാശിയെ പാപത്തിൽ നിന്ന് രക്ഷിക്കാനും ദൈവവുമായുള്ള ഒരു ബന്ധത്തിലേക്ക് മനുഷ്യവർഗ്ഗത്തെ മടക്കി കൊണ്ടുവരാനും യേശുക്രിസ്തുവിലൂടെ ദൈവം ചെയ്ത കാര്യത്തിന്റെ സന്തോഷവാർത്തയാണ് സുവിശേഷം.

നാല് ലളിതമായ സത്യങ്ങൾ ഇതിൽ അടങ്ങിയിരിക്കുന്നു.

1. ദൈവം നമ്മെ സ്നേഹിക്കുന്നു.

ദൈവം നമ്മെ സൃഷ്ടിച്ചത് അവനെ അറിയാനും, അവനെ സ്നേഹിക്കാനും, അവനുമായുള്ള കൂട്ടായ്മയിൽ ജീവിക്കാനുമാണ്.

"തന്റെ ഏകജാതനായ പുത്രനിൽ വിശ്വസിക്കുന്ന ഏവനും നശിച്ചുപോകാതെ നിത്യജീവൻ പ്രാപിക്കേണ്ടതിന്നു ദൈവം അവനെ നല്കുവാൻ തക്കവണ്ണം ലോകത്തെ സ്നേഹിച്ചു. " — യോഹന്നാൻ 3:16.

2. പാപം നമ്മെ ദൈവത്തിൽ നിന്ന് അകറ്റി നിർത്തുന്നു.

എല്ലാ മനുഷ്യരും പാപം ചെയ്തു, പാപം നമ്മെ ദൈവത്തിന്റെ വിശുദ്ധിയിൽ നിന്ന് വേർതിരിക്കുന്നു. "ഒരു വ്യത്യാസവുമില്ല; എല്ലാവരും പാപം ചെയ്തു ദൈവതേജസ്സു ഇല്ലാത്തവരായിത്തീർന്നു" — റോമർ 3:23
പാപം ചെയ്യാത്തവരായി ആരുമില്ല എന്നതാണ് ദൈവത്തിന്റെ പ്രഖ്യാപനം. ആ പ്രഖ്യാപനത്തെ മറികടന്ന് ആരെങ്കിലും തങ്ങളെ നീതിമാന്മാരെന്ന് കരുതിയാൽ നിങ്ങൾക്കു തെറ്റി. ദൈവത്തിന്റെ നിലവാരം എത്ര ഉന്നതമെന്ന് നിങ്ങൾക്കു മനസ്സിലായിട്ടില്ല.

3. യേശുക്രിസ്തു നമ്മുടെ പാപങ്ങൾക്കുവേണ്ടി മരിച്ചു അടക്കപ്പെട്ടു വീണ്ടും ഉയിർത്തെഴുന്നേറ്റു.

ദൈവം തന്റെ പുത്രനായ യേശുക്രിസ്തുവിനെ ഈ ഭൂമിയിലേക്ക് അയച്ചു, അവൻ നമ്മുടെ പാപങ്ങൾക്കു വേണ്ടി കുരിശിൽ മരിച്ചു, അടക്കം ചെയ്യപ്പെട്ടു, മൂന്നാം ദിവസം വീണ്ടും ഉയിർത്തെഴുന്നേറ്റു. തന്റെ യാഗമരണത്തിലൂടെ, നമുക്ക് പാപമോചനം ലഭിക്കുന്നതിനും ദൈവവുമായി അനുരഞ്ജനപ്പെടുന്നതിനും അവൻ വഴിയൊരുക്കി.

“ക്രിസ്തു നമ്മുടെ പാപങ്ങൾക്കു വേണ്ടി തിരുവെഴുത്തുകളിൻ പ്രകാരം മരിച്ചു; അവൻ അടക്കപ്പെട്ടു, തിരുവെഴുത്തുകളിൻ പ്രകാരം മൂന്നാം ദിവസം ഉയിർത്തെഴുന്നേറ്റു” — 1 കൊരിന്ത്യർ 15:3–4.

4. രക്ഷക്കായി നാം മാനസാന്തരപ്പെടുകയും യേശുക്രിസ്തുവിൽ വിശ്വസിക്കുകയും ചെയ്യുക.

പാപത്തിൽ നിന്ന് പിന്തിരിയാനും യേശുക്രിസ്തുവിൽ ആശ്രയിക്കാനും അവന്റെ കൃപയാൽ രക്ഷയുടെ ദാനം സ്വീകരിക്കാനും ദൈവം നമ്മെ വിളിക്കുന്നു.

“കർത്താവായ യേശുക്രിസ്തുവിൽ വിശ്വസിക്കുക, എന്നാൽ നീയും നിന്റെ കുടുംബവും രക്ഷപ്രാപിക്കും” — പ്രവൃത്തികൾ 16:31.

❤ സുവിശേഷം ഒറ്റ വാക്യത്തിൽ : യേശുക്രിസ്തു നമ്മുടെ പാപങ്ങൾക്കു വേണ്ടി മരിച്ചു, അടക്കം ചെയ്യപ്പെട്ടു, വീണ്ടും ഉയിർത്തെഴുന്നേറ്റു, തന്നിൽ വിശ്വസിക്കുന്ന എല്ലാവർക്കും പാപമോചനവും ദൈവവുമായുള്ള അനുരഞ്ജനവും നിത്യജീവനും വാഗ്ദാനം ചെയ്യുന്നു.

രക്ഷ എന്നത് നമ്മുടെ സ്വന്തം നല്ല പ്രവൃത്തികളാൽ നാം സമ്പാദിക്കുന്ന ഒന്നല്ല; വിശ്വാസത്തിലൂടെ ലഭിച്ച ദൈവകൃപയുടെ ഒരു ദാനമാണിത് (എഫെസ്യർ 2:8–9).

എന്തുകൊണ്ടാണ് ഇതിനെ സുവിശേഷം എന്ന് വിളിക്കുന്നത്?

പാപിയായ മനുഷ്യനെ സംബന്ധിച്ചിടത്തോളം ഇതിനേക്കൾ ഒരു നല്ല വാർത്തയില്ല, കാരണം യേശുക്രിസ്തുവിലൂടെ നമുക്ക് പാപത്തിനും മരണത്തിനും അതീതമായ പ്രത്യാശയുണ്ട്. മരണം അന്തിമമല്ലെന്ന് അവന്റെ പുനരുത്ഥാനം പ്രഖ്യാപിക്കുന്നു.

നിങ്ങൾ ചെയ്യേണ്ടത്?

നിങ്ങൾ ഒരു പാപിയാണെന്ന് സമ്മതിക്കുക. എന്റെ പാപത്തിന്റെ ശിക്ഷ എനിക്കു പകരക്കാരനായി ക്രിസ്തു ഏറ്റെടുത്തുവെന്ന് നിങ്ങൾ വിശ്വസിക്കുക. യേശുവിനെ നിങ്ങളുടെ രക്ഷിതാവും കർത്താവുമായി സ്വീകരിക്കുക.